निर्वाचन प्रचारका लागि निर्वाचन आयोगद्वारा टिकटक भिडियो प्रतियोगिता सुरु

प्रतिनिधिसभा सदस्य निर्वाचन, २०८२ लाई केन्द्रमा राख्दै निर्वाचन आयोगले टिकटकमार्फत मतदाता शिक्षा तथा प्रचारप्रसार अभियान सञ्चालन गर्ने भएको छ। युवामाझ लोकप्रिय सामाजिक सञ्जाल टिकटकलाई प्रयोग गर्दै निर्वाचनलाई भव्य, सभ्य र प्रभावकारी बनाउने उद्देश्यले आयोगले भिडियो प्रतियोगिता आयोजना गर्न लागेको हो।

आयोगका अनुसार निर्वाचन आचारसंहिता, मतदाता शिक्षा, मतदान प्रक्रिया, मतदाताको अधिकार तथा कर्तव्यजस्ता विषय समेटेर एक मिनेटसम्मको मौलिक टिकटक भिडियो तयार गरी आफ्नो सामाजिक सञ्जालमा पोस्ट गर्नुपर्नेछ। साथै, तयार गरिएको भिडियो फागुन १७ गतेभित्र आयोगको इमेलमा पठाउनुपर्ने व्यवस्था गरिएको छ।

प्रतियोगितामा सहभागी भिडियोमध्ये सबैभन्दा बढी भ्युअर्स प्राप्त गर्ने उत्कृष्ट तीन भिडियोहरूलाई नगद पुरस्कार प्रदान गरिनेछ। पहिलो हुनेलाई ५० हजार रुपैयाँ, दोस्रोलाई ३० हजार रुपैयाँ र तेस्रोलाई २० हजार रुपैयाँसहित प्रमाणपत्र प्रदान गरिने आयोगले जनाएको छ।

भिडियोहरू संवादमूलक, सन्देशमूलक र मौलिक अडियो तथा अभिनययुक्त हुनुपर्नेछ। मतदानको महत्त्व, सही तरिकाले मतपत्रमा छाप लगाउने विधि, असल उम्मेदवार छनोट, निर्वाचन आचारसंहिता पालनाजस्ता विषयलाई प्राथमिकता दिइनेछ।

एक व्यक्तिले एउटै विषयमा एउटा मात्र भिडियो पठाउन पाउनेछन् भने दुई वा बढी व्यक्तिले संयुक्त रूपमा पनि भिडियो निर्माण गर्न सक्नेछन्। आयोगमा प्राप्त भिडियोको प्रसारण अधिकार आयोगसँग रहने र सामाजिक सञ्जालमार्फत सार्वजनिक गरिने जनाइएको छ। उत्कृष्ट भिडियोको छनोट स्वतन्त्र विज्ञ तथा आयोगको संयुक्त मूल्याङ्कनबाट गरिनेछ।