टिएमएस प्रणालीमा समस्या, लगानीकर्ता कारोबार गर्नबाट वञ्चित

काठमाडौं । नेपाल स्टक एक्सचेञ्ज (नेप्से)को अनलाइन ट्रेडिङ प्रणाली टिएमएस (Trade Management System) मा समस्या देखिएपछि लगानीकर्ताहरूले शेयर किनबेच गर्ने अवसर गुमाएका छन्। बजार खुलेदेखि नै अधिकांश ब्रोकर कम्पनीहरूको टिएमएस प्रणाली राम्रोसँग सञ्चालन हुन नसकेपछि अनलाइनमार्फत कारोबार गर्न चाहने लगानीकर्ताहरू प्रभावित भएका हुन्।लगानीकर्ताहरूका अनुसार बिहान बजार खुलेपछि नै धेरै ब्रोकरको सिस्टममा लगइन गर्न समस्या देखिएको थियो भने कतिपयमा अर्डर राख्दा पनि प्रणालीले काम नगरेको गुनासो गरिएको छ। यसका कारण बजारमा किनबेच गर्न चाहने धेरै लगानीकर्ताहरू कारोबारबाट वञ्चित भएका छन्।विशेषगरी बजारमा उतारचढाव भइरहेको समयमा अनलाइन प्रणाली अवरुद्ध हुँदा लगानीकर्ताले समयमै शेयर किन्ने वा बेच्ने निर्णय कार्यान्वयन गर्न नसक्दा आर्थिक अवसर गुमाउने अवस्था सिर्जना भएको बताइएको छ।बजार खुलेदेखि देखिएको प्राविधिक समस्याका कारण लगानीकर्ताहरूले सामाजिक सञ्जालमार्फत समेत असन्तुष्टि व्यक्त गरिरहेका छन्। यो समाचार तयार पार्दासम्म धेरै ब्रोकर कम्पनीहरूको टिएमएस प्रणाली पूर्ण रूपमा सञ्चालनमा आउन सकेको छैन, जसका कारण अनलाइन कारोबार प्रभावित बनेको छ।लगानीकर्ताहरूले यस्तो समस्या दोहोरिन नदिन सम्बन्धित निकायले प्राविधिक प्रणालीलाई थप विश्वसनीय र स्थिर बनाउन आवश्यक सुधार गर्नुपर्ने माग समेत गरेका छन्।