सोनापुर मिनरल्स एण्ड ओइलले आर्थिक वर्ष २०८१ को तेस्रो त्रैमास अर्थात् चैत मसान्तसम्मको आफ्नो वित्तीय विवरण सार्वजनिक गरेको छ। गत वर्षको तुलनामा कम्पनीले आम्दानी तथा संचालन नाफामा उल्लेखनीय सुधार गरे पनि वर्षको अन्त्यसम्म अझै केही घाटा बेहोर्नुपरेको देखिन्छ।

कम्पनीले १ अर्ब ७६ करोड ४२ लाख रुपैयाँको सञ्चालन आम्दानी आर्जन गरेको छ, जुन गत वर्षको १ अर्ब १७ करोड ७७ लाख रुपैयाँको तुलनामा ४९.७९% ले वृद्धि भएको हो। आम्दानीमा आएको यस तीव्र वृद्धिले कम्पनीको अन्य वित्तीय सूचकहरूमा सकारात्मक असर पारेको देखिन्छ।

विशेषगरी सञ्चालन लागत कटौती र कार्यक्षमता सुधार सँगै कम्पनीको ग्रस प्राफिट (सकल नाफा) गत वर्षको ८ करोड २१ लाख रुपैयाँबाट बढेर यस वर्ष ३० करोड ३५ लाख रुपैयाँ पुगेको छ, जुन २६५.७९% को उच्च वृद्धिदर हो।

हालको त्रैमासमा अन्य आम्दानी सामान्य रूपमा घट्दै ४१६ हजार रुपैयाँ पुगेको छ, जबकि गत वर्ष सो आम्दानी ४३४ हजार रुपैयाँ थियो। तथापि, यसपटक कम्पनीले ९ करोड ४८ लाख रुपैयाँको संचालन नाफा कमाउन सफल भएको छ, जबकि गत वर्ष ८ करोड ३५ लाख रुपैयाँको नोक्सानीथियो।

यद्यपि कम्पनीले अझै पनि ७ करोड ५९ लाख रुपैयाँ घाटा देखाएको छ, यो घाटा गत वर्षको २७ करोड ८० लाख रुपैयाँको तुलनामा उल्लेखनीय रूपमा घटेको हो। घाटा कम हुँदै गएको यो अवस्था कम्पनी सुधारको बाटोमा रहेको संकेत दिन्छ।

प्रति शेयर आम्दानी (EPS) अझै पनि ऋणात्मक रहे पनि गत वर्षको -१२.०५ बाट -३.२९ मा झरेको छ, जुन घाटा कम भएको पुष्टि गर्छ। यस्तै, प्रति शेयर नेटवर्थ पनि १७०.७३ रुपैयाँबाट बढेर १८५.८६ रुपैयाँ पुगेको छ, जसले लगानीकर्ताको सम्पत्ति मूल्यमा वृद्धि भएको जनाउँछ।

रिजर्भ एण्ड सरप्लस (जगेडा कोष) मा पनि २१.३२% को वृद्धि भएको छ, जुन २ अर्ब १७ करोड रुपैयाँबाट बढेर २ अर्ब ६४ करोड रुपैयाँ पुगेको छ। इक्विटी शेयर पुँजी भने अघिल्लो वर्षको समान ३ अर्ब ७ करोड रुपैयाँ मै यथावत् छ।

समग्रमा हेर्दा, सोनापुर मिनरल्स एण्ड ओइलले आर्थिक वर्ष २०८१ को तेस्रो त्रैमासमा सुधारको स्पष्ट संकेत देखाएको छ। यदि यही प्रगति अन्तिम त्रैमासमा पनि कायम रह्यो भने, कम्पनीले यो वर्ष घाटाबाट नाफातर्फ उन्मुख हुने आधार बलियो बनाउने सम्भावना छ।