दार्चुला पावर लिमिटेडको वार्षिक साधारणसभा मंसिर १२ गते, शुक्रबार सम्पन्न भयो। साधारणसभाले आर्थिक वर्ष २०८१/८२ का वित्तीय विवरणदेखि आइपिओ (प्रारम्भिक सार्वजनिक निष्काशन) जारी गर्ने प्रस्तावसम्मका सबै सामान्य तथा विशेष एजेन्डाहरू सर्वसम्मतिले पारित गरेको कम्पनीले जानकारी दिएको छ।

अपि पावर कम्पनी लिमिटेडको सहायक कम्पनी दार्चुला पावर हाल दार्चुला जिल्लामा २८.३०४ मेगावाट क्षमताको मध्य चमेलिया जलविद्युत आयोजना निर्माण गरिरहेको छ। करिब रु. ५६६ करोड लागत अनुमान गरिएको आयोजनाको निर्माण तीव्र गतिमा अगाडि बढिरहेको कम्पनीको दाबी छ।

सभामा सञ्चालक समितिका अध्यक्षले प्रस्तुत गरेको आर्थिक वर्ष २०८१/८२ को वार्षिक प्रतिवेदन छलफलपछि सर्वसम्मतिले पारित भयो। प्रतिवेदनमा आयोजनाको भौतिक प्रगति, लागत व्यवस्थापन, सञ्चालनगत चुनौती र आगामी वर्षका लक्ष्यहरू समेटिएका थिए। यस्तै, सो आर्थिक वर्षका वासलात, नाफा–नोक्सान, नगद प्रवाह विवरणलगायत सबै वित्तीय कागजातहरू पनि सभाले अनुमोदन गर्यो। कम्पनीले वित्तीय शिस्त र पारदर्शिताप्रति देखाएको प्रतिबद्धतालाई सभाले प्रशंसा गरेको उल्लेख छ।

कम्पनी ऐन २०६३ को दफा १११ अनुसार आर्थिक वर्ष २०८२/८३ का लागि नयाँ लेखापरीक्षक नियुक्त गर्ने प्रस्ताव पनि सभाले पारित गर्यो।

साधारणसभाले दार्चुला पावर लिमिटेडले आफ्नो साधारण सेयरको प्रारम्भिक सार्वजनिक निष्काशन (IPO) अघि बढाउने प्रस्ताव अनुमोदन गरेको छ। यसका लागि कम्पनीले मुक्तिनाथ क्यापिटलसँग सम्झौता गरी आइपिओ प्रक्रियालाई अघि सारिसकेको प्रबन्ध निर्देशक शास्वत चालिसेले सभामा जानकारी दिए।

आइपिओ अघि अधिकृत पूँजी तथा जारी पूँजी वृद्धि गर्ने, र त्यसअनुसार प्रबन्धपत्र तथा नियमावलीमा आवश्यक संशोधन गर्ने प्रस्तावहरू पनि सभाले स्वीकृत गर्यो।

सभामा बोल्दै संचालक सञ्जीव न्यौपानेले मध्य चमेलिया जलविद्युत आयोजनाको अहिलेको प्रगति निकै उत्साहजनक रहेको बताए। उनले निर्माण गति, ठेक्का व्यवस्थापन, सामग्री आपूर्ति, स्थानीय समन्वय र वित्त व्यवस्थापनको प्रभावकारी संयोजनका कारण आयोजना तोकिएको समयभन्दा अगावै सम्पन्न हुन सक्ने आत्मविश्वास व्यक्त गरे।

कम्पनीको रणनीति, व्यवस्थापन क्षमता र आयोजनाको द्रुत प्रगतिले सेयरधनी तथा सरोकारवालामा सकारात्मक संकेत दिएको सभामा सरोकारवालाहरूको धारणा थियो।