नेपाली बजारमा सुन–चाँदीको मूल्यमा भारी गिरावट, सुन तोलामा ९,५०० ले घट्यो

काठमाडौं । नेपाली बजारमा आज (बिहीबार) सुन र चाँदीको मूल्यमा भारी गिरावट आएको छ। नेपाल सुनचाँदी व्यवसायी महासंघका अनुसार सुनको मूल्य एकै दिन प्रतितोला ९ हजार ५०० रुपैयाँले घटेको हो।

महासंघले सार्वजनिक गरेको विवरणअनुसार आज छापावाल सुन प्रतितोला २ लाख ९५ हजार २०० रुपैयाँमा कारोबार भइरहेको छ। हिजो (बुधबार) सुन प्रतितोला ३ लाख ४ हजार ७०० रुपैयाँमा कारोबार भएको थियो, जसको तुलनामा आज उल्लेख्य गिरावट देखिएको हो।

सुनसँगै चाँदीको मूल्यमा पनि गिरावट आएको छ। आज चाँदी प्रतितोला ६२० रुपैयाँले घटेर ४ हजार ९८० रुपैयाँ कायम भएको छ। बुधबार चाँदी प्रतितोला ५ हजार ६०० रुपैयाँमा बिक्री भएको थियो।

महासंघका अनुसार अन्तर्राष्ट्रिय बजारमा सुनको मूल्यमा आएको उतार–चढावका कारण स्थानीय बजारमा पनि प्रत्यक्ष असर परेको हो। विश्व बजारको अस्थिरता, डलरको मूल्य र अन्तर्राष्ट्रिय माग–आपूर्तिको अवस्थाले मूल्य घटबढमा प्रभाव पारेको बताइएको छ।