नेपाल राष्ट्र बैंकका गभर्नर महाप्रसाद अधिकारीले बैंकहरूले राष्ट्र बैंकलाई दोष दिएर लाभांश दिन नसकेको आरोपलाई अस्वीकार गरेका छन्। नेपाल बैंकर्स संघको साधारणसभामा बोल्दै उनले यो आरोप आधारहीन भएको स्पष्ट पारे।

गभर्नर अधिकारीले भने, “नेपाल राष्ट्र बैंकको कारण लाभांश दिन पाएनौँ भन्नु बैंकहरूको आरोप मात्रै हो। बैंकहरूले आफ्नो क्षमताअनुसार लाभांश दिन सक्छन्।” उनले वित्तीय क्षेत्रमा देखिएका उतारचढावका बीच पनि राष्ट्र बैंकले स्थायित्व कायम गर्न सफल भएको दाबी गरे।

गभर्नर अधिकारीका अनुसार, हाल अर्थतन्त्रमा देखिएका बाह्य कारणहरूले बैंकिङ क्षेत्र प्रभावित भए पनि वित्तीय सूचक सकारात्मक रहेको छ। उनले भने, “प्रशस्त तरलता छ, वित्तीय सूचक राम्रो छन्, डराउनुपर्ने कुनै कारण छैन।”

कार्यक्रममा गभर्नरले बढ्दो खराब कर्जाप्रति चिन्ता व्यक्त गर्दै बैंकहरूलाई कर्जा असुलीमा ध्यान दिन संकेत गरे। उनले ऋण नतिर्नेहरूबारे गलत व्याख्या र बैंकविरोधी आवाजका कारण कर्जा असुलीमा समस्या देखिएको बताए।

अधिकारीले राष्ट्र बैंकले ल्याउने नीतिहरुका कारण बैंकिङ क्षेत्रमा समस्या नहुने उल्लेख गर्दै सुधारका प्रयास जारी रहेको बताए। विशेषगरी, बाह्य थ्रेटलाई नियन्त्रण गर्न राष्ट्र बैंक सक्रिय रहेको गभर्नरको भनाइ थियो।