अन्तर्राष्ट्रिय मुद्रा कोष (आईएमएफ) ले एसियाली देशहरूलाई गैरभन्सार अवरोधहरू घटाउन र क्षेत्रीय व्यापारलाई अझ गहिरो रूपमा एकीकृत गर्न आग्रह गरेको छ। आईएमएफका अनुसार, यस कदमले अमेरिकी भन्सार नीतिहरू र विश्वव्यापी वित्तीय झट्काबाट हुने असरलाई कम गर्न मद्दत गर्नेछ।

आईएमएफको नवीनतम एसिया क्षेत्रीय आर्थिक प्रतिवेदन अनुसार, एसियाको आर्थिक वृद्धि मुख्य रूपमा व्यापारमा आधारित छ। चीनले विश्व बजारका लागि आपूर्तिशृंखला केन्द्रको रूपमा भूमिका खेलेको छ। तर, अमेरिकासँगको व्यापारिक तनाव र भन्सार नीतिहरूले एसियाको निर्यातमा असर पुर्‍याउने सम्भावना बढेको छ।

प्रतिवेदनले अमेरिकासँगको व्यापार विवाद र कृत्रिम बुद्धिमत्ता (एआई) क्षेत्रमा बढ्दो लगानीका कारण एसियाली देशबीच अन्तर्क्षेत्रीय व्यापारमा उल्लेखनीय वृद्धि भएको जनाएको छ। आईएमएफले यस अवसरलाई अझ उपयोग गर्दै क्षेत्रीय व्यापार एकीकरण प्रवर्धन गर्न, गैरभन्सार अवरोध हटाउन र व्यापारिक वातावरण सहज बनाउन सुझाव दिएको छ।

आईएमएफले सेवाक्षेत्रमा सुधार, लगानीको प्रभावकारिता सुनिश्चित गर्न र वृद्ध जनसंख्याको असर घटाउने नीति अपनाउन सुझाव दिएको छ। यी सुधारहरूले मध्यम अवधिमा आर्थिक वृद्धि दर बढाउन र क्षेत्रीय अर्थतन्त्र सन्तुलनमा ल्याउन मद्दत गर्ने उल्लेख गरिएको छ।

आईएमएफका एसिया तथा प्रशान्त विभागका निर्देशक कृष्ण श्रीनिवासनका अनुसार, एसिया मध्यवर्ती वस्तुको व्यापारमा अत्यधिक एकीकृत छ। कुल निर्यातको करिब ६० प्रतिशत एसियाभित्रै हुन्छ, तर तयारी वस्तु (finished goods) को व्यापार मात्र ३० प्रतिशत छ, जसले अमेरिकी र युरोपेली बजारमा निर्भरता देखाउँछ।

आईएमएफले सुझाव दिएको छ कि एसियाली देशहरूले युरोपेली संघ जस्तै व्यापक क्षेत्रीय व्यापार सम्झौता गर्न सके ठूलो लाभ लिन सक्छन्। हालका धेरै द्विपक्षीय सम्झौताले दोहोरिएका नियम र असंगत मापदण्ड सिर्जना गरेका छन्।

कोभिड–१९ पछि बढेका गैरभन्सार अवरोधहरू अझै पनि एसियामा व्यापक छन्। यी हटाउँदा निर्यात बजार विविधीकरण, लागत घटाउने र व्यापारिक झट्काबाट सुरक्षात्मक प्रभाव प्राप्त गर्न सकिने आईएमएफको मत छ।

आईएमएफले सन् २०२५ मा एसियाको अर्थतन्त्र ४.५ प्रतिशतले वृद्धि हुने अनुमान गरेको छ, जुन गत वर्षको ४.६ प्रतिशतभन्दा अलिक कम भए पनि अप्रिलको अनुमानभन्दा ०.६ प्रतिशत बढी हो। यो वृद्धि अमेरिकी उच्च भन्सार लाग्नु अघि बढेको निर्यातका कारण भएको बताइएको छ।
तर, सन् २०२६ मा वृद्धि दर ४.१ प्रतिशतमा घट्ने सम्भावना छ। यसको कारण चीनमा कमजोर माग, व्यापार तनाव र उदाउँदो अर्थतन्त्रहरूमा घट्दो निजी उपभोगलाई ठहर गरिएको छ।