काठमाडौं – भुजुङ्ग हाइड्रोपावर लिमिटेडले सर्वसाधारणका लागि निष्काशन गरेको साधारण शेयर (आईपीओ) मा आवेदन दिने आज अन्तिम दिन हो। कम्पनीले माघ १२ गतेदेखि बिक्री खुला गरेको यो शेयरमा इच्छुक लगानीकर्ताले कार्यालय समयभित्र आवेदन दिइसक्नुपर्नेछ।

आयोजना प्रभावित क्षेत्रका बासिन्दा र वैदेशिक रोजगारीमा रहेका नेपालीहरूका लागि शेयर बाँडफाँट गरिसकेपछि कम्पनीले दोस्रो चरणमा सर्वसाधारणका लागि खुला गरेको हो।

यस्तो छ शेयर विवरण कम्पनीले आफ्नो कुल १ अर्ब रुपैयाँ जारी पूँजीको २० प्रतिशत (अर्थात २० करोड रुपैयाँ) बराबरको २० लाख कित्ता शेयर निष्काशन गर्ने अनुमति पाएको थियो। जसमध्ये ५० प्रतिशत शेयर स्थानीय र वैदेशिक रोजगारीमा रहेकाहरूलाई यसअघि नै बिक्री गरिसकिएको छ।

अहिले सर्वसाधारणका लागि भने कुल ८ लाख ३० हजार कित्ता शेयर उपलब्ध गराइएको छ। यसअघि कर्मचारीका लागि २० हजार कित्ता र सामूहिक लगानी कोषका लागि ५० हजार कित्ता शेयर छुट्याइएको थियो।

कसरी र कति दिने आवेदन? लगानीकर्ताले न्यूनतम १० कित्तादेखि अधिकतम ५० हजार कित्तासम्मका लागि आवेदन दिन सक्नेछन्। शेयर निष्काशन तथा बिक्री प्रबन्धकको जिम्मेवारी कुमारी क्यापिटल लिमिटेडले सम्हालेको छ। सि–आस्बा सदस्य रहेका बैंक तथा वित्तीय संस्था र 'मेरो शेयर' मार्फत घरमै बसेर आवेदन दिन सकिने व्यवस्था छ।

आयोजनाको अवस्था र जोखिम

परियोजना: कम्पनीले ७.५ मेगावाट क्षमताको माथिल्लो मिदिम जलविद्युत आयोजना सञ्चालन गरिरहेको छ। यो आयोजनाले २०८१ वैशाख ६ गतेदेखि नै उत्पादन सुरु गरिसकेको छ।
लागत: आयोजनाको प्रतिमेगावाट लागत २४ करोड ९० लाख ८२ हजार ७०३ रुपैयाँ रहेको छ।
लगानी फिर्ता: साधारण लगानी फिर्ता हुन करिब साढे ९ वर्ष लाग्ने प्रक्षेपण गरिएको छ।
रेटिङ: इक्रा नेपालले कम्पनीलाई 'इक्राएनपी सिंगल बी प्लस' रेटिङ प्रदान गरेको छ, जसले वित्तीय दायित्व पुरा गर्ने क्षमतामा उच्च जोखिम रहेको बुझाउँछ।