लक्ष्मी सनराइज बैंक २७ करोड नोक्सानीमा: खराब कर्जा व्यवस्थापनका कारण नाफा प्रभावित
Author
NEPSE TRADING
काठमाडौं – मर्जरपछि ठूलो पुँजी संरचना बनाएको लक्ष्मी सनराइज बैंक लिमिटेडको चालु आर्थिक वर्षको दोस्रो त्रैमासको वित्तीय विवरण निराशाजनक देखिएको छ। बैंकले प्रकाशित गरेको अपरिष्कृत वित्तीय विवरण अनुसार पुस मसान्तसम्ममा बैंक २७ करोड ३६ लाख रुपैयाँ खुद नोक्सानीमा गएको छ।
अघिल्लो आर्थिक वर्षको सोही अवधिमा बैंकले १ अर्ब १६ करोड २० लाख रुपैयाँ खुद नाफा आर्जन गरेको थियो। एक वर्षको अन्तरालमा बैंकको नाफामा ठूलो पहिरो जाँदा समग्र वित्तीय सूचकहरू समेत प्रभावित भएका छन्।
किन भयो नोक्सानी? बैंकको व्यवसायिक आम्दानी (खुद ब्याज आम्दानी) मा १.१४ प्रतिशतको सामान्य वृद्धि देखिए तापनि 'इम्पेरमेन्ट चार्ज' (खराब कर्जा बापतको प्रावधान) मा भएको भारी वृद्धिका कारण बैंक नोक्सानीमा धकेलिएको हो। गत वर्ष १ अर्ब ७९ करोड ३० लाख रुपैयाँ रहेको यस्तो प्रावधान यो वर्ष बढेर ४ अर्ब ४७ करोड ३० लाख रुपैयाँ पुगेको छ। यसले बैंकको सञ्चालन मुनाफालाई १५ करोड ९८ लाख रुपैयाँले ऋणात्मक बनाएको छ।
प्रमुख वित्तीय सूचकहरूको अवस्था
प्रतिशेयर आम्दानी (EPS): नाफा ऋणात्मक भएसँगै प्रतिशेयर आम्दानी २ रुपैयाँ ४ पैसा नोक्सानीमा रहेको छ।
वितरणयोग्य मुनाफा: बैंकको वितरणयोग्य नाफा ८४ करोड २७ लाख रुपैयाँ ऋणात्मक देखिएको छ, जसले तत्काल सेयरधनीलाई लाभांश दिन सक्ने क्षमतामा प्रश्न उठाएको छ।
पुँजी र कोष: बैंकको चुक्ता पुँजी २६ अर्ब ७८ करोड ११ लाख रुपैयाँ पुगेको छ भने जगेडा कोषमा १७ अर्ब ७३ करोड ८२ लाख रुपैयाँ सञ्चित छ।
निक्षेप र कर्जा: बैंकले ३ खर्ब ८४ अर्ब रुपैयाँ निक्षेप संकलन गरी २ खर्ब ८७ अर्ब रुपैयाँ कर्जा प्रवाह गरेको छ।
बैंकको खुद फि तथा कमिसन आम्दानीमा भने १८.१५ प्रतिशतको राम्रो सुधार देखिएको छ। यद्यपि, बजारमा बढ्दो खराब कर्जाको चुनौतीलाई चिर्न नसक्दा बैंकले यो त्रैमासमा वित्तीय चाप खेप्नु परेको देखिन्छ। बैंकको प्रतिशेयर नेटवर्थ १६६ रुपैयाँ २३ पैसा कायम भएको छ।
