काठमाडौं – धितोपत्र बजारमा पछिल्लो समय कम बजार मूल्य भएका जलविद्युत् कम्पनीहरूको वर्चस्व देखिन थालेको छ । विशेषगरी २०० रुपैयाँभन्दा कम मूल्यमा कारोबार भइरहेका हाइड्रोपावर कम्पनीमा लगानीकर्ताको आकर्षण (चाम) बढ्दा त्यसले समग्र बजारको दिशालाई समेत प्रभावित पारेको छ ।

आँखु खोला जलविद्युत् कम्पनीको मूल्यमा देखिएको बढोत्तरीसँगै सुरु भएको यो लहर अहिले दर्जनभन्दा बढी कम मूल्यका कम्पनीहरूमा सरेको छ । सानो पुँजी लगानी गरेर धेरै कित्ता शेयर आउने र सामान्य मूल्य वृद्धि हुँदा पनि प्रतिशतका आधारमा उच्च मुनाफा प्राप्त हुने मनोवैज्ञानिक कारणले गर्दा साना तथा खुद्रा लगानीकर्ताहरू यस्ता स्टकमा झुम्मिएका हुन् ।

पछ्याउँदै अन्य कम्पनी बजारमा आँखु खोलाले नेतृत्व गरेपछि अप्पर तामाकोसी, शिव श्री हाइड्रो, बलेफी, हिमाल दोलखा, नेशनल हाइड्रो र लिवर्टी इनर्जी लगायतका कम्पनीको कारोबारमा तीव्रता आएको छ । बिहीबारको कारोबारमा मात्रै हिमाल दोलखा र शिव श्री हाइड्रोपावरको मूल्यमा सकारात्मक सर्किट (करिब १० प्रतिशत वृद्धि) लागेको छ । विश्लेषकहरूका अनुसार जब बजारमा कम मूल्यका स्टकहरू चल्न थाल्छन्, त्यसलाई अक्सर 'बुलिस ट्रेन्ड'को बलियो आधार मान्ने गरिन्छ ।

गिरावटमा पनि उत्साहजनक कारोबार साताको पाँचौँ कारोबार दिन बिहीबार भने नेप्से परिसूचकमा केही दबाब देखियो । लगातारको वृद्धिपछि अल्पकालीन लगानीकर्ताहरू मुनाफा सुरक्षित (प्रोफिट बुकिङ) गर्नतर्फ लाग्दा परिसूचक १७.५३ अंकले ओरालो लागेर २७१४.०५ विन्दुमा ओर्लिएको छ । बजार घटे पनि कारोबार रकमले भने लगानीकर्ताको मनोबल उच्च रहेको पुष्टि गर्छ ।

बिहीबार ३२० कम्पनीको ३ करोड ५४ लाख कित्ता शेयर किनबेच हुँदा १४ अर्ब ५६ करोड रुपैयाँभन्दा बढीको कारोबार भएको छ । परिसूचक घट्दा पनि कारोबार रकम १४ अर्ब माथि रहनुलाई सकारात्मक मानिन्छ । यसले तल्लो मूल्यमा शेयर उठाउन खोज्ने 'बार्गेन हन्टर्स'हरू अझै बजारमा सक्रिय रहेको देखाउँछ । बिहीबार कारोबारका आधारमा ङादी ग्रुप पावर ५९ करोड ९९ लाख रुपैयाँसहित अग्रस्थानमा रह्यो ।

प्राविधिक पक्ष र प्रतिरोध प्राविधिक चार्टअनुसार बजारले हाल 'हायर हाई' र 'हायर लो' को सकारात्मक शृङ्खला बनाइरहेको छ । अघिल्लो महिनादेखि लय समातेको बजारले लामो समयको 'डाउन ट्रेन्ड'लाई तोडिसकेको छ । तर, तत्कालका लागि २८२४.८५ को विन्दु एउटा कडा प्रतिरोध (रेसिस्टेन्स) का रूपमा देखिएको छ । बजार यो तहभन्दा माथि जान थप ऊर्जा र खरिद चापको पर्खाइमा छ ।

यदि आगामी दिनमा बजारमा थप गिरावट आएमा २५६८.९४ को विन्दुले पहिलो बलियो टेवा (सपोर्ट) प्रदान गर्ने प्राविधिक विश्लेषकहरूको ठम्याइ छ । हाल बजार 'कन्सोलिडेसन' अर्थात् मूल्य समायोजनको प्रक्रियामा रहेकाले २७०० को मनोवैज्ञानिक विन्दुभन्दा माथि टिकिरहनुलाई प्राविधिक रूपमा सुखद मानिएको छ ।

क्षेत्रगत उतारचढाव जलविद्युत् समूहमा चमक देखिँदा विकास बैंक र लघुवित्त क्षेत्रका लगानीकर्ताले भने बिहीबार केही नोक्सानी बेहोरेका छन् । कर्पोरेट डेभलपमेन्ट बैंक, मिथिला लघुवित्त र सप्तकोशी डेभलपमेन्ट बैंकको शेयर मूल्यमा नकारात्मक सर्किट लागेको छ । बजारका जानकारहरूका अनुसार लगानीकर्ताहरू अहिले सेक्टर परिवर्तन (सेक्टर रोटेसन) गर्दै कम मूल्यका र तुलनात्मक रूपमा जोखिम कम भएका कम्पनीतिर मोडिएका छन् ।

समग्रमा, २७५० देखि २८२० को बीचमा केही समय उतारचढाव देखिए पनि बजारले आफ्नो वृद्धिको यात्रालाई निरन्तरता दिने संकेतहरू चार्टमा अझै जीवितै छन् । २८२५ को प्रतिरोधलाई भोल्युमसहित पार गरेमा नेप्सेले नयाँ उचाइ तय गर्ने सम्भावना प्रबल छ ।