काठमाडौँ — साताको पहिलो दिन आइतबार पनि शेयर बजार ओरालो लागेको छ। गत बिहीबारको तुलनामा कारोबार रकम बढेपनि सबै सूचक राताम्मै बनेका छन्। निरन्तर केही दिनदेखि बजार घटिरहेको कारण लगानीकर्तामाझ बेचबिखनको चाप बढ्दो छ।

नेपाल स्टक एक्सचेञ्ज (नेप्से) परिसूचक आइतबार २७.१४ अंकले घटेर २७६१ अंकमा झरेको छ। विहीबार बजार २७८८ अंकमा बन्द भएको थियो। लगातार दोहोरो अंकको गिरावट देखिँदा लगानीकर्ताले नोक्सान सीमित गर्न “स्टप–लस” बिक्री बढाएका छन्।

यस दिन २४९ कम्पनीको ७ अर्ब ७३ करोड ५१ लाख रुपैयाँ बराबरको शेयर कारोबार भएको छ। यो रकम बिहीबारको ७ अर्ब ४६ करोड ४१ लाख रुपैयाँभन्दा करिब २७ करोड बढी हो। कारोबार रकम बढेपनि बजारमा उकासो आउन सकेन। बजारमा ५८ कम्पनीको मूल्य बढ्दा १९१ कम्पनी घटे। सबै १३ उपसमूह राताम्मै बनेका छन्। व्यापार, अन्य, लघुवित्त, उत्पादन तथा प्रशोधन र बैंकिङ उपसमूह १ प्रतिशतभन्दा बढीले ओरालो लागेका छन्।

गत वर्ष साउन ३१ गते बजार ३००० अंक माथि पुगेको थियो। यस वर्ष पनि साउन १३ गते बजार फेरि ३००२ अंकमा पुगेको भएपनि त्यसयता बजार निरन्तर चापमा छ। अहिले नेप्से फेरि २७०० को वरिपरि अड्किएको छ।

बढ्ने र घट्ने कम्पनी

आज सर्वाधिक बढ्नेमा आरबीबी म्युचुअल फण्ड–१ पर्‍यो जसको इकाई मूल्य ७.९३ प्रतिशतले बढ्यो। अपर स्याङ्गी हाइड्रोपावर ६.२९ प्रतिशतले बढ्दा कालिका पावर र अपर हेवा खोला हाइड्रोपावर पनि ५ प्रतिशतभन्दा बढीले बढे।
विपरीत रुपमा, सम्पदा लघुवित्त ७.०६ प्रतिशतले घट्दै सबैभन्दा बढी गुमाउने कम्पनी बन्यो भने ट्रेड टावर कम्पनी ५.८८ प्रतिशतले घट्यो।

कारोबार रकमका आधारमा नेपाल रिइन्स्योरेन्स कम्पनी शीर्ष स्थानमा रह्यो जसको ५१ करोड ६७ लाख रुपैयाँ बराबरको कारोबार भयो। त्यसपछि हिमालयन रिइन्स्योरेन्स कम्पनी ३५ करोड ४५ लाख र नेपाल रिपब्लिक मिडिया २४ करोड ९६ लाख रुपैयाँ बराबरको कारोबारसहित दोस्रो र तेस्रो स्थानमा परे।

प्रविधिक विश्लेषण

बजार ३०२८ को टप बनाएको केही दिनमै निरन्तर ओरालो लागेको छ। आइतबार २७६१ मा बन्द हुँदा बजार ५०–दिने मूभिङ एभरेज (50MA) वरिपरि आइपुगेको छ। प्रविधिक विश्लेषक अजित खनालका अनुसार यही स्तर ६१ प्रतिशत फिबोनाची रिट्रेसमेन्टसँग मेल खाने भएकाले यसलाई बलियो सपोर्ट मान्न सकिन्छ।
उनका अनुसार यदि बजारले २७५०–२७६० को दायरामा सकारात्मक रिबाउन्ड गर्न सकेन भने लगानीकर्तामाझ फेरि प्यानिक बढ्न सक्छ। आरएसआई (RSI) पनि आज ४० भन्दा तल झरेको छ, जसले बजार अझै कमजोर देखिएको संकेत गर्छ।

ब्रोकर विश्लेषण

दस ठूला ब्रोकरहरूको कारोबार हेर्दा खरिद र बिक्री लगभग बराबर देखियो। तर ५ वटा ब्रोकरले बढी खरिद गरेका छन् भने ५ ले बढी बिक्री गरेका छन्।
केपीसिएल (ब्रोकर नं. ५८) मार्फत लगानीकर्ताले १ लाख ४२ हजार कित्ता शेयर खरिद गरे। त्यस्तै, यु एम एच एल (६२ नं.) बाट १ लाख ११ हजार कित्ता खरिद भयो।
तर बी एच एल (५५ नं.) बाट ३ लाख ६५ हजार कित्ता बिक्री भयो भने केबिएल बाट पनि २ लाख २५ हजार कित्ता शेयर बिक्री भएको छ।

विश्लेषकहरूका अनुसार, कारोबार रकम बढेपनि बजार घट्दा आएको ठूलो आपूर्ति अझै रोकिएको छैन। यसले बजारलाई निकट भविष्यमा पनि अस्थिर बनाउन सक्ने देखिन्छ।