नेपाल राष्ट्र बैंकका गभर्नर महाप्रसाद अधिकारीले आर्थिक वर्ष २०८१/८२ का लागि सरकारले ल्याएको बजेटले लिएको नीतिलाई समर्थन गर्ने र मुलुकको समग्र अर्थतन्त्रको हित हुने गरी मौद्रिक नीति आउने बताएका छन्।

नेपाल व्यवस्थापन संघले सोमबार आयोजना गरेको आगामी वर्षको मौद्रिक नीतिसम्बन्धी अन्तरक्रियाका क्रममा गभर्नर अधिकारीले समग्र वित्तीय र मौद्रिक स्थायित्व कायम गर्ने गरी आगामी साउन दोस्रो साताभित्र राष्ट्र बैंकले मौद्रिक नीति ल्याउने तयारी गरिरहेको बताए।

‘देशको अर्थतन्त्रलाई हित हुने गरी साउनको पहिलो वा दोस्रो सातामा मौद्रिक नीति आउँछ। सबै क्षेत्रबाट आएका सकारात्मक सुझाव समेटेर समग्र वित्तीय स्थायित्व कायम हुने गरी मौद्रिक नीति ल्याउँछौं,’ उनले भने।

गभर्नर अधिकारीले कोरोना महामारी र रूस-युक्रेन तनावका कारण विश्व अर्थतन्त्र नै समस्यामा परेको र नेपालमा पनि बाह्य क्षेत्र सन्तुलन बिग्रिँदा कडा खालको मौद्रिक नीति जारी गर्नुपरेको बताए।

उनले गत आर्थिक वर्ष २०७९/८० को अन्तिम त्रैमास र चालु आर्थिक वर्षको सुरूआतबाटै मौद्रिक नीतिका व्यवस्था लचिलो बनाउँदै लगिएको उल्लेख गर्दै आगामी आर्थिक वर्षको मौद्रिक नीतिमा पनि त्यसलाई निरन्तरता दिइने बताए।

उनले भने, ‘हामी सुधारोन्मुख छौं तर समान रूपले सुधार गर्न नसकेको यथार्थ हो। ठूलो जनसंख्या देश बाहिर रहेपछि आन्तरिक माग र खपत घटेको छ। निर्माण क्षेत्रमा देखिएको शिथिलताले बहुआयामिक असर देखाएको छ,’ गभर्नर अधिकारीले भने, ‘आर्थिक र मौद्रिक हिसाबले हामी सबल छौं। मुद्रास्फीति वाञ्छित सीमाभित्रै छ। बाह्य क्षेत्रमा अहिले स्थिरता देखिएको छ र समग्र वित्तीय स्थायित्व कायम गर्न सफल भएका छौं।’

त्यस अवसरमा नेपाल चेम्बर अफ कमर्सका अध्यक्ष कमलेश कुमार अग्रवालले निजी क्षेत्रको मनोबल उकास्ने र ऋणीहरुलाई दायित्व भुक्तानी गर्न सहज हुने गरी कुनै एकीकृत प्याकेज मौद्रिक नीतिमार्फत ल्याइनुपर्ने बताए।