लगातार ६ कारोबार दिनसम्म ओरालो लागेको शेयर बजारले सोमबार पुनः सुधारको संकेत देखाएको छ। नेपाल स्टक एक्सचेञ्ज (नेप्से) परिसूचक १९.३० अंकले उकालो लाग्दै २६२८.३६ मा पुगेको छ। अघिल्लो दिन २६०९.०५ मा रोकिएको सूचकले २६ सयको मनोवैज्ञानिक स्तरमा टिक्दै लगानीकर्तामा आशा जगाएको हो।

सोमबार ७ अर्ब ३५ करोड रुपैयाँभन्दा बढीको कारोबार भएको थियो। यद्यपि, कारोबार रकम अघिल्लो दिनको तुलनामा केही घटेको छ। कुल ३२४ कम्पनीका १ करोड ६२ लाख कित्ताभन्दा बढी शेयर किनबेच भए। राधी हाइड्रोपावरले ५९ करोड ७६ लाख रुपैयाँ बराबरको कारोबार गर्दै अग्रस्थान ओगट्यो भने नेपाल पुनर्बिमा र हिमालयन रिइन्सुरेन्सले क्रमशः दोस्रो र तेस्रो स्थानमा रहे।

५ वटा कम्पनी सकारात्मक सर्किटमा पुगेका छन् भने १ कम्पनी नकारात्मक सर्किटमा थामिएको थियो। बजारले २५ सयको स्तर पार नगरी फर्किएको संकेतलाई विश्लेषकहरूले ‘साइकोलोजिकल सपोर्ट रेस्पेक्ट’ मानिरहेका छन्।

प्रविधिक विश्लेषणः डबल बटम र मर्निङ स्टारको बुलिश संकेत

नेप्से सूचक प्रविधिक विश्लेषणका आधारमा बलियो समर्थन क्षेत्रमा पुगेको देखिएको छ। बजारले ‘डबल बटम’ बनाउँदै “मर्निङ स्टार” क्यान्डल बनाएको छ, जुन बलियो उल्टो ट्रेन्डको (रिभर्सल) संकेत हो। RSI (Relative Strength Index) करिब ४४ को आसपास देखिएको छ, जुन ओभरसोल्ड नभए पनि बाउन्सको सम्भावना प्रकट गर्छ।

लामो समयदेखि चलिरहेको ट्रेन्डलाइनबाट सूचकले सपोर्ट पाएको देखिन्छ र हाल सोही ट्रेन्डलाइनमाथि टिक्न सफल भएको छ। यसलाई कायम राख्न सके २६५० देखि २७०० अंकसम्म पुग्ने संभावना प्रवल रहेको विश्लेषकहरूको भनाइ छ।

सुधारको सन्देश : लगानीकर्ता झुकिँदै, तर सतर्क

विश्लेषकहरूका अनुसार ठूला ब्रोकरहरूले सोमबार बिक्रीभन्दा बढी खरिद गरेका छन्, जसले बजारमा संस्थागत लगानीकर्ताको पुनः प्रवेश संकेत गर्छ। यदि यही प्रवृत्ति जारी रह्यो भने बजार साइडवेज अवस्थाबाट माथि निस्कनेछ।

हालसम्म गभर्नर नियुक्ति प्रक्रिया, मौद्रिक नीति समीक्षा र आगामी आर्थिक वर्षको बजेटप्रति बजारले उच्च चासो देखाएको छ। यिनै विषयले बजारको दिशा निर्धारण गर्नेछ। राजनीतिक सहमतिसहित डा. विश्व पौडेलको गभर्नर नियुक्तिको चर्चा भए पनि प्रक्रिया अझै टुंगोमा पुगेको छैन।

विश्लेषकहरू भन्छन् — “बजार स्थायित्व खोजिरहेको छ, तर यथार्थ सुधारका लागि ठोस नीतिगत र मनोवैज्ञानिक समर्थन आवश्यक छ।” हालको अवस्थामा लगानीकर्ताले सावधानीसाथ सानो परिमाणमा इन्ट्री गर्न सकिने सल्लाह दिइएको छ। आगामी सेसनले बजारको ट्रेन्ड कन्फर्म गर्नेछ।