नेपाल स्टक एक्सचेन्ज (नेप्से) आज तीव्र गतिमा उकालो लागेको छ। बजार खुलेको मात्र ३ मिनेटमै १०० अंकभन्दा बढीले वृद्धि भएसँगै नेप्सेमा दिनको पहिलो ४ प्रतिशतको सर्किट ब्रेकर लागेको हो।

आजको कारोबारको सुरुवातदेखि नै लगानीकर्तामा उच्च उत्साह देखिएको छ। बजारको तीव्र वृद्धिका कारण २७ करोड रुपैयाँभन्दा बढीको कारोबार भइसकेको छ र बजार सकारात्मक सर्किटमा पुगेको छ।

यो उछाल नेपाल राष्ट्र बैंकले जारी गरेको नयाँ मौद्रिक सर्कुलरपछि आएको हो। सर्कुलरले बैंक तथा वित्तीय संस्थाहरूलाई पूँजी बजारमैत्री नीति लागू गर्ने संकेत दिएको भन्दै लगानीकर्ताले बजारमा बलियो खरीद दबाब देखाएका छन्।

यसअघि, ‘जेन–जेड आन्दोलन’ पछि खुलेको बजारमा निरन्तर गिरावट आएको थियो र त्यतिबेला बजारमा नेगेटिभ सर्किट ब्रेकर लागेको थियो। तर आजको बजारमा त्यही नकारात्मक भावनाको ठ्याक्कै उल्टो प्रतिक्रिया देखिएको छ, जसले लगानीकर्तामा पुनः आत्मविश्वास जगाएको छ।

विश्लेषकहरूका अनुसार, नयाँ नीतिगत स्पष्टता र तरलता सहजताका कारण बजारमा छोटो अवधिको तीव्र वृद्धि देखिएको हो। यद्यपि, उनीहरूले यसलाई ‘स्वस्थ सुधारपछि आएको स्वाभाविक उछाल’ मानिरहेका छन्।