आरबिबि मर्चेन्ट बैंकिङ लिमिटेडले सञ्चालन गर्ने सामूहिक लगानी कोष आरबिबि फोकस ४० मा आवेदन दिने समय थप गरिएको छ। भदौ १८ गतेदेखि निष्काशन तथा बिक्री खुला भएको उक्त कोषमा अब असोज १ गतेसम्म आवेदन दिन सकिने भएको हो।

यो कोष अन्तर्गत कुल १० करोड इकाई प्रतिइकाई १० रुपैयाँ अंकित दरमा बिक्रीमा ल्याइएको छ। यसअनुसार, कोषको कुल मूल्य १ अर्ब रुपैयाँ हुने छ।

नियम अनुसार, कोष प्रवर्द्धक राष्ट्रिय वाणिज्य बैंकका लागि न्यूनतम १ करोड ४० लाख इकाई वा कुल बिक्रीको १४ प्रतिशत सुरक्षित गरिएको छ। त्यस्तै, योजना व्यवस्थापक आरबिबि मर्चेन्ट बैंकिङका लागि न्यूनतम १० लाख इकाई वा १ प्रतिशत छुट्याइएको छ। बाँकी ८ करोड ५० लाख इकाई सर्वसाधारण लगानीकर्ताका लागि खुला गरिएको छ।

निवेशकले न्यूनतम १०० इकाईदेखि अधिकतम १ करोड इकाईसम्म आवेदन दिन पाउने व्यवस्था गरिएको छ। १२ वर्ष अवधिको यस योजनामा आवेदन दिनका लागि सि आस्बा सेवामा सहभागी सम्पूर्ण बैंक तथा वित्तीय संस्थाका शाखा कार्यालयबाट वा मेरो शेयर अनलाइन प्रणालीमार्फत पनि आवेदन दिन सकिनेछ।

यस कोषका इकाई निष्काशनका लागि रेटिङ्ग संस्थाले पनि मूल्याङ्कन गरेको छ। केयर रेटिङ नेपालले कोष प्रवर्द्धक राष्ट्रिय वाणिज्य बैंकलाई CARE NP A+ Issuer Rating दिएको छ भने इक्रा नेपालले योजना व्यवस्थापक आरबिबि मर्चेन्ट बैंकिङलाई ICRA NP AMC Quality 3 Rating प्रदान गरेको छ।

यो योजनाले लगानीकर्तालाई दीर्घकालीन आम्दानी र पूँजी वृद्धिको अवसर दिने अपेक्षा गरिएको छ।