आरएसडिसी लघुवित्त वित्तीय संस्था लिमिटेडले आफ्नो बाह्रौं वार्षिक साधारण सभा आगामी मंसिर १२ गते शुक्रबार (तद्नुसार नोभेम्बर २८, २०२५) मा आयोजना गर्ने भएको छ। कम्पनीको सञ्चालक समितिको मिति २०८२ कात्तिक १५ गते बसेको १७७औं बैठकको निर्णयानुसार उक्त सभा बुटवलस्थित वेष्टर्न एसियन होटल प्रा. लि. मा बिहान ९:३० बजेदेखि सुरु हुनेछ।

सभाले मुख्यतः आर्थिक वर्ष २०८१/८२ को सञ्चालक समितिको वार्षिक प्रतिवेदन, लेखापरीक्षकको प्रतिवेदनसहितको वार्षिक आर्थिक विवरणहरू (बासलात, नाफा नोक्सान हिसाब, नगद प्रवाह विवरण) उपर छलफल गरी पारित गर्नेछ। यसका साथै सभाले चुक्ता पूँजीको प्रतिशतले हुन आउने रु. ८,२७,२५,१५३.३६ (आठ करोड सत्ताईस लाख पच्चिस हजार एक सय त्रिपन्न रुपैयाँ र पैसा छत्तीस पैसा) नगद लाभांश (लाभांशमा लाग्ने करसहित) वितरण गर्ने प्रस्तावलाई स्वीकृति प्रदान गर्नेछ।

सभाका लागि कम्पनीले कात्तिक २५ गते एक दिनका लागि शेयर दाखिल खारेज (बुक क्लोज) बन्द गर्ने निर्णय गरेको छ। यसर्थ, कात्तिक २४ गतेसम्म शेयर खरिद बिक्री गरी कायम हुने शेयरधनीहरूले मात्र सभामा भाग लिन र लाभांश प्राप्त गर्न योग्य हुनेछन्।

साधारण सभामा छलफल गरिने विशेष प्रस्तावहरूमा आगामी आर्थिक वर्ष २०८२/८३ का लागि बाह्य लेखापरीक्षक नियुक्त गर्ने र निजको पारिश्रमिक तोक्ने प्रस्तावसमेत रहेको छ। कम्पनी ऐन २०६३ को दफा १११(३) बमोजिम बहालवाला लेखापरीक्षक श्री पि. एल. आर. जि. एसोसिएट्स चार्टर्ड एकाउण्टेण्ट्स पुनर्नियुक्त हुन योग्य छन्।

सबैभन्दा महत्त्वपूर्ण विशेष प्रस्तावका रूपमा यस वित्तीय संस्थालाई अन्य कुनै वित्तीय संस्थासँग एक आपसमा गाभ्ने (मर्जर) तथा प्राप्ति (एक्विजिशन) गर्न सञ्चालक समितिलाई अख्तियारी प्रदान गर्ने रहेको छ। यसमा मर्जर समिति गठन गर्ने, डी.डी.ए. (विस्तृत लेखा परीक्षण) नियुक्त गर्ने र मर्जर तथा प्राप्तिको सन्दर्भमा सम्पूर्ण प्रक्रिया अगाडि बढाउने अधिकार सञ्चालक समितिलाई दिने प्रस्ताव सभामा अनुमोदनका लागि पेश गरिनेछ। कम्पनीको शेयर रजिष्ट्रार ग्लोबल आइएमई क्यापिटल लिमिटेड रहेको छ।