नेपाल आर्थिक संघ र अर्थ मन्त्रालयबीच अर्थतन्त्र सुधारबारे छलफल

नेपाल आर्थिक संघले देशको वर्तमान आर्थिक अवस्था र दिगो अर्थतन्त्र निर्माणबारे उपप्रधानमन्त्री तथा अर्थमन्त्री विष्णु पौडेलसँग छलफल गरेको छ।

संघका अध्यक्ष प्राडा विश्वम्भर प्याकुरेलले संघले अर्थमन्त्रालयसँग धेरै वर्षदेखि सहकार्य गर्दै आएको र आगामी दिनमा पनि अर्थतन्त्रलाई सही दिशामा लैजानका लागि तयार रहेको बताए। संघले उत्पादकत्व बढाउन तथा दिगो समाधान प्रस्तुत गर्न विभिन्न अध्ययन तथा अनुसन्धानमार्फत सल्लाह सुझाव दिँदै आएको उनले स्पष्ट पारे।

अर्थमन्त्री पौडेलले नेपाल आर्थिक संघलाई अर्थशास्त्रीहरूको छाता संगठनको रूपमा स्वीकार गर्दै संघले अर्थतन्त्रसँग सम्बन्धित विषयमा विगतदेखि नै योगदान दिँदै आएको उल्लेख गरे।

अर्थमन्त्रालयमा भएको छलफलमा संघका उपाध्यक्ष प्राडा गोविन्द नेपाल, महासचिव डा. गोपाल प्रसाद तिवारी, सचिव डा. खोम खरेल, अर्थविद केशव आचार्य, प्राडा केशव राज खड्का, डा. यादव मणि घिमिरेलगायतका अर्थशास्त्रीहरूको सहभागिता रहेको थियो।

संघले सरकारलाई आवश्यक नीति तथा कार्यक्रम कार्यान्वयन गर्न सघाउने प्रतिबद्धता व्यक्त गर्दै अर्थमन्त्रालयद्वारा सुरु गरिएका आर्थिक सुधार र अन्य योजनाहरूलाई प्रभावकारी बनाउन योगदान पुर्‍याउने बताएको छ।