एभरेष्ट बैंकको नाफा सुधार, इम्पेयरमेन्ट चार्जले वृद्धिदर सीमित बनायो

एभरेष्ट बैंक लिमिटेडले चालु आर्थिक वर्षको दोस्रो त्रैमाससम्म ब्याज र शुल्क आम्दानीमा सुधार देखाउँदै खुद नाफा सामान्य रूपमा बढाएको छ। तर, इम्पेयरमेन्ट चार्ज बढेसँगै नाफा वृद्धिदर सीमित भएको देखिन्छ।

बैंकले पुस मसान्तसम्म २ अर्ब ११ करोड ७१ लाख रुपैयाँ खुद नाफा आर्जन गरेको छ, जुन गत आर्थिक वर्षको सोही अवधिको तुलनामा २.०४ प्रतिशतले बढी हो। अघिल्लो आवको सोही अवधिमा बैंकले २ अर्ब ७ करोड ४७ लाख रुपैयाँ खुद नाफा कमाएको थियो।

बैंकको ब्याज आम्दानीमा ५.९६ प्रतिशतको वृद्धि भएको छ, जसले नाफा वृद्धिमा सहयोग पुर्याएको देखिन्छ। समीक्षा अवधिमा बैंकको ब्याज आम्दानी ४ अर्ब ५७ करोड रुपैयाँ पुगेको छ, जुन अघिल्लो आवमा ४ अर्ब ३१ करोड रुपैयाँ थियो।

त्यस्तै, शुल्क र कमिसन आम्दानीमा पनि उल्लेख्य सुधार देखिएको छ। अघिल्लो आवको सोही अवधिमा ७६ करोड ५० लाख रुपैयाँ रहेको आम्दानी २०.३८ प्रतिशतले बढेर ९२ करोड ९ लाख रुपैयाँ पुगेको छ। यसले कुल सञ्चालन आम्दानीमा ९.७३ प्रतिशतको वृद्धि ल्याएको छ।

तर, इम्पेयरमेन्ट चार्जको वृद्धि नाफा वृद्धिको दरमा सीमितता ल्याएको छ। समीक्षा अवधिमा बैंकको इम्पेयरमेन्ट चार्ज ३४ करोड ९५ लाख रुपैयाँबाट बढेर ५६ करोड २७ लाख रुपैयाँ पुगेको छ।

बैंकको वितरणयोग्य मुनाफा २३.०४ प्रतिशतले बढेर ३ अर्ब ३४ करोड २८ लाख रुपैयाँ पुगेको छ। यससँगै, लाभांश वितरण क्षमता पनि ३०.५८ प्रतिशतबाट बढेर ३१.९३ प्रतिशतमा पुगेको छ, जसले आगामी दिनमा लाभांश वितरणको सम्भावना सुदृढ गरेको संकेत गर्छ।

यद्यपि, नाफा बढ्न सके पनि बैंकको प्रतिसेयर आम्दानी (ईपीएस) १ रुपैयाँ २० पैसाले घटेर ३० रुपैयाँ ८६ पैसामा झरेको छ।

वित्तीय सूचकका हिसाबले बैंकको खराब कर्जा अनुपात ०.६८ प्रतिशत, कस्ट अफ फण्ड ३.४५ प्रतिशत र रिटर्न अन इक्विटी (आरओई) १३.१९ प्रतिशत रहेको छ, जुन समग्रमा सन्तोषजनक मानिन्छ।

बैंकको चुक्ता पूँजी १३ अर्ब ७२ करोड १३ लाख रुपैयाँ रहेको छ भने जगेडा कोषमा १८ अर्ब ५२ करोड रुपैयाँ सञ्चित छ। पुस मसान्तसम्म बैंकले ३ खर्ब ४ अर्ब रुपैयाँ निक्षेप संकलन गरी २ खर्ब ३६ अर्ब रुपैयाँ कर्जा लगानी गरेको छ।