ग्लोबल आइएमई बैंकको नाफा १.१०% वृद्धि, इम्पेरमेन्ट चार्जले दबाव

ग्लोबल आइएमई बैंक लिमिटेड (GBIME) ले आर्थिक वर्ष २०८१/८२ को चौथो त्रैमाससम्मको अपरिष्कृत वित्तीय विवरण सार्वजनिक गरेको छ। विवरणअनुसार बैंकको खुद नाफा अघिल्लो वर्षको सोही अवधिको तुलनामा १.१० प्रतिशतले वृद्धि भई ६ अर्ब २० करोड रुपैयाँ पुगेको छ। गत वर्ष सोही अवधिमा नाफा ६ अर्ब १३ करोड रुपैयाँ थियो।

इम्पेरमेन्ट चार्ज ३ अर्ब ६१ करोड रुपैयाँबाट बढेर ४ अर्ब ३० करोड रुपैयाँ पुगेपछि नाफामा दबाव परेको छ। समीक्षा अवधिमा खुद ब्याज आम्दानी ०.८५ प्रतिशतले घटेको भए पनि खुद फि तथा कमिशन आम्दानी २०.१२ प्रतिशत र कुल सञ्चालन आम्दानी ३.०१ प्रतिशतले बढेको छ। तर सञ्चालन मुनाफा भने २.७५ प्रतिशत घटेको छ।

प्रतिशेयर आम्दानी (EPS) १८ पैसा बढेर १६ रुपैयाँ २८ पैसा पुगेको छ भने प्रतिशेयर नेटवर्थ १७७ रुपैयाँ ६३ पैसा र मूल्य–आम्दानी अनुपात (P/E Ratio) १५.९५ गुणा कायम छ। बैंकको चुक्ता पूँजी ३८ अर्ब ११ करोड रुपैयाँ छ भने जगेडा कोषमा २९ अर्ब ५८ करोड रुपैयाँ सञ्चित छ।

आर्थिक वर्षको अन्त्यसम्म बैंकले ५ खर्ब ५० अर्ब रुपैयाँ निक्षेप संकलन गरी ४ खर्ब ११ अर्ब रुपैयाँ कर्जा प्रवाह गरेको छ। वितरणयोग्य मुनाफा ५ अर्ब ३७ करोड रुपैयाँ र वितरणयोग्य EPS १४ रुपैयाँ ११ पैसा रहेको छ।