सुन–चाँदीको मूल्यमा ठूलो उछाल, सुन फेरि ३ लाख नाघ्यो

माघ २१ गते, बुधबार, नेपाली बजारमा सुन र चाँदीको मूल्य उल्लेख्य रूपमा बढेको छ। यस दिन सुनको मूल्य फेरि ३ लाख रुपैयाँ नाघ्दै प्रतितोला १४ हजार ४०० रुपैयाँले वृद्धि भएको हो। नेपाल सुनचाँदी व्यवसायी महासंघका अनुसार छापावाल सुनको मूल्य प्रतितोला ३ लाख ४ हजार ७०० रुपैयाँ कायम भएको छ। मंगलबार सुन प्रतितोला २ लाख ९० हजार ३०० रुपैयाँमा कारोबार भएको थियो।

त्यसैगरी, चाँदीको मूल्य पनि तोलामा २६५ रुपैयाँले बढेको छ। बुधबार चाँदी प्रतितोला ५ हजार ६०० रुपैयाँमा खरिद–बिक्री भएको छ भने मंगलबार यसको मूल्य ५ हजार ३३५ रुपैयाँ रहेको थियो। अन्तर्राष्ट्रिय बजारको प्रभाव र स्थानीय माग बढेसँगै सुन–चाँदीको मूल्यमा वृद्धि देखिएको व्यवसायीहरूले बताएका छन्।