मन्दाकिनी हाइड्रोपावरले हकप्रद सेयर निष्कासन गर्ने

मन्दाकिनी हाइड्रोपावर लिमिटेडले करिब ४३ करोड रुपैयाँ बराबरको हकप्रद सेयर निष्कासन गर्ने भएको छ। कम्पनीले यसका लागि विद्युत् नियमन आयोगबाट पूर्व स्वीकृति प्राप्त गरिसकेको छ।

कम्पनीका अनुसार, हकप्रद निष्कासनबाट संकलित रकममध्ये २३ करोड ३४ लाख रुपैयाँ ऋण भुक्तानीका लागि प्रयोग गरिनेछ भने बाँकी रकम माथिल्लो सार्दी खोला जलविद्युत् आयोजना निर्माणमा लगानी गरिनेछ।

उक्त आयोजनामा कम्पनीको कुल ३५ करोड रुपैयाँ लगानी गर्ने योजना रहेको छ। यद्यपि, आयोजनाको अनुमानित लागत ६५ करोड ९२ लाख रुपैयाँ रहेकोमा हालसम्म ४६ करोड ३३ लाख रुपैयाँ मात्र बैंकमार्फत स्वीकृत भइसकेको कम्पनीले जनाएको छ।

अब कम्पनीले नेपाल धितोपत्र बोर्ड (सेबोन) मा हकप्रद सेयर निष्कासनका लागि औपचारिक अनुमति माग्ने प्रक्रिया अघि बढाउनेछ।