नारायणी डेभलपमेन्ट बैंकले हकप्रद शेयर बाँडफाँट सम्पन्न — २६ लाख २४ हजार ६७६ कित्ता शेयर वितरण

नारायणी डेभलपमेन्ट बैंक लिमिटेडले १:१ अनुपातमा जारी गरेको २६,२४,६७६ कित्ता हकप्रद शेयरको बाँडफाँट सम्पन्न भएको छ। बैंकले मिति २०७९/०५/०८ सम्म कायम रहेका आफ्ना साविक शेयरधनीहरूलाई प्रतिशेयर अंकित मूल्य रु. १०० दरमा बराबर अनुपातमा हकप्रद शेयर जारी गरेको थियो।

निर्धारित समयभित्र विधिपूर्वक आवेदन दिने सबै योग्य आवेदकहरूको हकप्रद शेयर २०७९/०७/२५ गते बसेको बाँडफाँट समितिको बैठकले बाँडफाँट गरी निष्काशनकर्ता कम्पनीको सञ्चालक समितिलाई सिफारिस गरेको थियो। उक्त सिफारिसलाई अनुसरण गर्दै कम्पनीको सञ्चालक समितिले २०७९/०७/२७ गते बाँडफाँटलाई औपचारिक स्वीकृति प्रदान गरेको बैंकले जनाएको छ।

हकप्रद निष्कासन तथा बिक्री प्रबन्धकको रूपमा ग्लोबल आइएमई क्यापिटल लिमिटेड रहेको छ। क्यापिटलले आवेदन प्रक्रिया, बाँडफाँट तथा अन्य सम्बन्धित कार्य सञ्चालन गरेको जनाएको छ।

यससँगै नारायणी डेभलपमेन्ट बैंकको हकप्रद जारी प्रक्रिया औपचारिक रूपमा समाप्त भएको र शेयरधनीहरूको खातामा छिट्टै शेयर सूचीकृत हुने बैंकले जानकारी दिएको छ।