सहकारी दर्ता अभिलेखीकरणका लागि अनलाइन सफ्टवेयर प्रणाली सुरु, भौतिक उपस्थिति आवश्यक नपर्ने

राष्ट्रिय सहकारी नियमन प्राधिकरणले बचत तथा ऋणमुखी सहकारीहरूको दर्ता अभिलेखीकरणका लागि आधुनिक अनलाइन सफ्टवेयर प्रणाली सुरु गरेको छ। प्राधिकरणले बुधबार आयोजित सार्वजनिक समारोहमार्फत सहकारीका सञ्चालक वा व्यवस्थापन प्रतिनिधि भौतिक रूपमा हाजिर हुनुपर्ने आवश्यकता हटाउँदै स्वचालित डिजिटल प्रक्रियाबाट दर्ता अभिलेख अद्यावधिक हुने प्रणालीको आधिकारिक सुरुवात गरेको हो।

यस प्रणालीमार्फत अब सहकारीहरूले आवश्यक विवरण तथा अभिलेखहरू अनलाइनमार्फत नै पेश गर्न सक्ने छन्, जसले दर्ता प्रक्रिया सहज, छरितो र पारदर्शी हुने प्राधिकरणले बताएको छ। डिजिटल अभिलेखीकरणले सहकारी क्षेत्रको सुबिधाजनक निगरानी, बेहतर तथ्याङ्क व्यवस्थापन र अनुगमन–सुपरिवेक्षणको कार्यक्षमता बढाउने अपेक्षा गरिएको छ।

बचत तथा ऋणमुखी सहकारीहरूको नियमन, सुपरिवेक्षण र अनुगमन प्रभावकारी बनाउने उद्देश्यले सरकारले २०७८ माघ १४ गते राष्ट्रिय सहकारी नियमन प्राधिकरण गठन गरेको थियो। गठनपश्चात् प्राधिकरणले सहकारी क्षेत्रको पारदर्शिता, वित्तीय अनुशासन र सुशासन प्रवर्द्धनका लागि विभिन्न सुधारात्मक तथा डिजिटल पहल गर्दै आएको छ।

प्राधिकरणका अनुसार अनलाइन अभिलेखीकरण प्रणालीले सहकारीको वास्तविक अवस्था पहिचान गर्न मद्दत गर्नेछ भने कारोबार संरचना, सदस्य विवरण, वित्तीय स्थिति तथा जोखिम संकेतहरूलाई रियल–टाइममा अवलोकन गर्न सकिने वातावरण तयार हुनेछ।

नयाँ प्रणाली लागू भएपछि सहकारी दर्ता प्रक्रियामा हुने ढिलाइ, कागजी झन्झट र अनावश्यक आवत–जावत समाप्त हुने, साथै सम्पूर्ण सहकारी फाइलिङ केन्द्रिय डाटाबेसमा सुरक्षित रूपमा व्यवस्थापन हुने प्राधिकरणले जनाएको छ।