राष्ट्र बैंकले ४० अर्ब रुपैयाँ बजारबाट प्रशोचन गर्ने, आज २ बजेसम्म बोलकबोल

नेपाल राष्ट्र बैंकले वित्तीय प्रणालीमा बढ्दो तरलता नियन्त्रण गर्न ४० अर्ब रुपैयाँ बजारबाट प्रशोचन गर्ने भएको छ। राष्ट्र बैंकले ३५ दिन अवधि का लागि निक्षेप संकलन उपकरण (Deposit Collection Instrument) मार्फत बोलकबोल प्रक्रिया सञ्चालन गर्न लागेको हो।

बैंक तथा वित्तीय संस्थाहरुमा अत्यधिक तरलता थुप्रिँदै गएपछि राष्ट्र बैंकले पछिल्लो समय लामो अवधिका उपकरणमार्फत बजारबाट रकम झिक्ने काम तीव्र बनाएको छ। राष्ट्र बैंकले गत तीन वर्षदेखि प्रत्येक आइतबार र बुधबार नियमित रूपमा बोलकबोलमार्फत पैसा झिक्दै आएको छ।

आजको बोलकबोलमा ‘क’, ‘ख’ र ‘ग’ वर्गका बैंक तथा वित्तीय संस्था मात्र सहभागी हुन पाउने छन्। इच्छुक संस्थाहरूले आज दिउँसो २ बजेसम्म अनलाइनमार्फत बोली पेश गर्न सक्ने सूचनामा उल्लेख छ।

राष्ट्र बैंकका अनुसार तोकिएको उपकरण खरिद गरेपछि बैंकहरूले त्यसलाई अन्य बैंक तथा वित्तीय संस्थामा धितोका रूपमा प्रयोग गर्न सक्नेछन्। न्यूनतम १० करोड र अधिकतम तोकिएको सीमा अनुसार ५ करोडले भाग गर्दा निःशेष भाग आउने गरी बोलकबोल गर्नुपर्नेछ।

सोधिएको निक्षेप संकलनमा बहुब्याजदर प्रणालीमा पनि बहुबोलकबोल गर्न सकिने राष्ट्र बैंकले जनाएको छ।

यसअघि राष्ट्र बैंकले निक्षेप संकलन उपकरणमार्फत ४ खर्ब २० अर्ब रुपैयाँ प्रशोचन गरिसकेको छ भने अल्पकालीन प्रकृतिको SDF मार्फत ४ खर्ब २५ अर्ब रुपैयाँ प्रशोचन भइसकेको छ।

यता लगानी हुन नसकेको ८ खर्ब ४४ अर्ब ५० करोड रुपैयाँ हाल राष्ट्र बैंकमा थुप्रिएको देखिन्छ, जसले वित्तीय प्रणालीमा तरलता व्यवस्थापनको दबाब अझै कायम रहेको संकेत गर्छ।