चुनावी सरगर्मीसँगै नेपालमा स्मार्टफोन आयात ४० प्रतिशतले वृद्धि

काठमाडौं । चुनावी सरगर्मीसँगै नेपालमा स्मार्टफोनको आयात उल्लेखनीय रूपमा बढेको छ। यही फागुन २१ गते देशभर प्रतिनिधिसभाको निर्वाचन हुन लाग्दा सार्वजनिक भएको भन्सार विभागको तथ्यांकअनुसार चालु आर्थिक वर्ष २०८२/८३ को साउनदेखि माघसम्म सात महिनामा २६ अर्ब ६८ करोड रुपैयाँ बराबरका १४ लाख १४ हजार स्मार्टफोन आयात भएका छन्। यस अवधिमा सरकारले ४ अर्ब ९७ करोड रुपैयाँ भन्सार राजस्व संकलन गरेको छ। गत आर्थिक वर्षको सोही अवधिको तुलनामा स्मार्टफोन आयात ४०.५९ प्रतिशतले बढेको देखिएको छ। माघ महिनामा मात्र ३ अर्ब ३८ करोड रुपैयाँका १ लाख ६२ हजार मोबाइल आयात भएका छन्, जुन अघिल्लो वर्षको तुलनामा ४९ प्रतिशतले बढी हो।

नेपालमा आयात भएका मोबाइलमा १३ प्रतिशत भ्याट र ५.६५ प्रतिशत अन्तशुल्क लाग्ने भएकाले कुल १८.६५ प्रतिशत रकम सरकारलाई राजस्वका रूपमा तिर्नुपर्छ। साथै आयातकर्ता, होलसेलर र रिटेलरको मार्जिनका कारण उपभोक्तासम्म पुग्दा मोबाइलको मूल्य करिब ४० प्रतिशतसम्म बढ्ने गरेको छ। माघ महिनामा आयात भएका मोबाइलको भन्सार मूल्य ३ अर्ब ३८ करोड भए पनि बजारमा यसको मूल्य करिब ४ अर्ब ४७ करोड रुपैयाँ पुगेको देखिन्छ।

तथ्यांकअनुसार नेपालमा मासिक औसत १ लाख ६२ हजार स्मार्टफोन आयात हुँदै आएको छ र ती अधिकांश बजारमै खपत भइरहेको देखिन्छ। बजारमा एउटा मोबाइलको औसत मूल्य करिब २९ हजार रुपैयाँ रहेको छ भने २० देखि ३० हजार रुपैयाँसम्मका मोबाइलको माग बढी रहेको व्यवसायीहरू बताउँछन्। पछिल्लो समय एआई सपोर्ट भएका आधुनिक मोबाइलको प्रयोग बढ्दै गएकाले महंगा स्मार्टफोनको माग पनि बढ्दै गएको छ। नयाँ मोडल आउने, पुरानो बिग्रने, हराउने तथा प्रविधि अपडेट गर्ने प्रवृत्तिका कारण पनि मोबाइलको खपत निरन्तर बढिरहेको देखिन्छ।