सुपर खुदी हाइड्रोपावरको आईपीओ फागुन ४ देखि, सर्वसाधारणका लागि खुला
Author
NEPSE TRADING
सुपर खुदी हाइड्रोपावर लिमिटेडले फागुन ४ गतेदेखि सर्वसाधारण लगानीकर्ताका लागि प्राथमिक सेयर (आईपीओ) निष्काशन गर्ने भएको छ। यसअघि आयोजना प्रभावित क्षेत्रका स्थानीय बासिन्दा तथा वैदेशिक रोजगारीमा रहेका नेपालीहरूका लागि निष्काशन गरिएको आईपीओ बाँडफाँटपछि अब कम्पनीले सर्वसाधारणका लागि सेयर निष्काशन गर्न लागेको हो।
कम्पनीले जारी पूँजी १ अर्ब ५५ करोड रुपैयाँको २० प्रतिशत अर्थात ३१ करोड रुपैयाँ बराबरको ३१ लाख कित्ता सेयर निष्काशन गर्ने अनुमति पाएको थियो। जसमध्ये १५ लाख ५० हजार कित्ता स्थानीय बासिन्दाका लागि र १ लाख ५५ हजार कित्ता वैदेशिक रोजगारीमा रहेका नेपालीहरूका लागि बाँडफाँट गरिसकेको छ। साथै, ७७ हजार ५०० कित्ता सेयर सामूहिक लगानी कोषहरूमा वितरण भइसकेको छ।
अब दोस्रो चरणमा कम्पनीले आफ्ना कर्मचारीहरूका लागि ३१ हजार कित्ता छुट्याएर बाँकी रहेको १२ लाख ८६ हजार ५०० कित्ता साधारण सेयर सर्वसाधारणका लागि निष्काशन गर्न लागेको हो। यी सेयरको अंकित मूल्य प्रतिकित्ता १०० रुपैयाँ रहेको छ, जसको कुल मूल्य १२ करोड ८६ लाख ५० हजार रुपैयाँ रहेको छ।
आईपीओमा न्यूनतम १० कित्ता र अधिकतम १ लाख कित्तासम्म आवेदन दिन सकिनेछ। निष्काशन छिटोमा फागुन १० गते र ढिलोमा फागुन १९ गतेसम्म खुला रहनेछ।
रेटिङ्ग एजेन्सी Care Ratings Nepal ले कम्पनीलाई केयरएनपी डबल बी इस्यूअर रेटिङ्ग प्रदान गरेको छ, जसले कम्पनीको दायित्व बहन गर्ने क्षमतामा मध्यम जोखिम रहेको संकेत गर्दछ।
कम्पनीले सञ्चालन गरेको २६ मेगावाटको माथिल्लो खुदी जलविद्युत आयोजनाको कुल लागत ५ अर्ब ३८ करोड रुपैयाँ रहेको छ। प्रतिमेगावाट लागत २० करोडभन्दा बढी रहेको यस आयोजनाको विद्युत अनुमतिपत्र अवधि २७ वर्ष ५ महिना बाँकी रहेको छ। आयोजनाको साधारण लगानी फिर्ता अवधि ७.२१ वर्ष र डिस्काउण्टमा १३.४२ वर्ष रहेको छ।
आईपीओ निष्काशन तथा बिक्री प्रबन्धक Global IME Capital Limited रहेको छ। लगानीकर्ताले नेपाल धितोपत्र बोर्डबाट अनुमति प्राप्त बैंक तथा वित्तीय संस्थामार्फत सी–आस्बा प्रणाली प्रयोग गरी आवेदन दिन सक्नेछन्।
