जोशी हाइड्रोपावरको ६५% हकप्रद शेयरमा आवेदन दिने आज अन्तिम दिन

जोशी हाइड्रोपावर डेभलपमेन्ट कम्पनी लिमिटेड (JOSHI) को हकप्रद शेयरमा आवेदन दिने आज (भदौ १९ गते) अन्तिम दिन भएको छ। कम्पनीले साउन १५ गतेदेखि हाल कायम चुक्ता पूँजीको ६५ प्रतिशत हकप्रद शेयर निष्काशन तथा बिक्री खुला गरेको हो। यस अन्तर्गत, १ कित्ता शेयर बराबर ०.६५ कित्ता अनुपातमा प्रतिशेयर १०० रुपैयाँ अंकित मूल्यका २४ लाख १४ हजार १०० कित्ता हकप्रद शेयर निष्काशन गरिएको छ, जसको कुल मूल्य २४ करोड १४ लाख १० हजार रुपैयाँ बराबर हुन्छ।

यस प्रयोजनका लागि कम्पनीले असार ८ गते बुकक्लोज गरेको थियो, जसअनुसार असार ५ गतेसम्म नेप्सेमा कारोबार भई कायम भएका शेयरधनीले मात्र आवेदन दिन सक्नेछन्। केयर रेटिङ्ग नेपालले कम्पनीलाई CARE-NP Single B Issuer Rating प्रदान गरेको छ, जसले वित्तीय दायित्व पूरा गर्ने क्षमतामा उच्च जोखिम रहेको संकेत गर्दछ।

यो हकप्रद निष्काशनको बिक्री प्रबन्धक लक्ष्मी सनराइज क्यापिटल लिमिटेड रहेको छ। लगानीकर्ताले कम्पनी कार्यालय, लक्ष्मी सनराइज बैंकको इलाम शाखा तथा आस्बा प्रणालीमार्फत सहभागी बैंक तथा वित्तीय संस्थाबाट वा ‘मेरो शेयर’ सफ्टवेयर प्रयोग गरेर अनलाइनमार्फत पनि आवेदन दिन सक्नेछन्। हाल कम्पनीको चुक्ता पूँजी ३७ करोड १४ लाख रुपैयाँ रहेको छ, जुन हकप्रद निष्काशनपछि ६१ करोड २८ लाख १० हजार रुपैयाँ पुग्नेछ। उठेको रकम कम्पनीले विभिन्न बैंक तथा वित्तीय संस्थाबाट लिएको ऋण र संस्थापकबाट लिएको सापटी भुक्तानी गर्न प्रयोग गर्ने योजना बनाएको छ।