एपोलो हाइड्रोपावरको आईपीओ चैत २६ गतेदेखि खुल्दै, सर्वसाधारणका लागि ७.८० लाख कित्ता प्रस्ताव

काठमाडौं । एपोलो हाइड्रोपावर लिमिटेड ले सर्वसाधारण लगानीकर्ताका लागि प्राथमिक शेयर (आईपीओ) निष्काशन गर्ने तयारी गरेको छ। कम्पनीले दोस्रो चरणअन्तर्गत चैत २६ गतेदेखि ७ करोड ८० लाख २० हजार रुपैयाँ बराबरको ७ लाख ८० हजार २०० कित्ता साधारण शेयर निष्काशनमा ल्याउने जनाएको हो। प्रतिकित्ता १०० रुपैयाँ अंकित दरमा शेयर सार्वजनिक गर्न लागिएको कम्पनीले स्पष्ट पारेको छ।यसअघि कम्पनीले आयोजना प्रभावित क्षेत्रका स्थानीय बासिन्दा तथा वैदेशिक रोजगारीमा रहेका नेपालीहरूका लागि आईपीओ निष्काशन गरी बाँडफाँट गरिसकेको छ। सो क्रममा स्थानीयका लागि ४ लाख ७० हजार कित्ता र विदेशमा कार्यरत नेपालीहरूका लागि ९४ हजार कित्ता शेयर वितरण गरिएको थियो। साथै, सामूहिक लगानी कोषका लागि ३७ हजार कित्ता र कम्पनीका कर्मचारीका लागि १८ हजार ८०० कित्ता शेयर छुट्याएर बाँडफाँट सम्पन्न भइसकेको छ।कम्पनीले कुल ५७ करोड रुपैयाँ जारी पूँजीको ३० प्रतिशत बराबर १४ करोड १० लाख रुपैयाँ बराबरको १४ लाख १० हजार कित्ता शेयर निष्काशन गर्ने अनुमति प्राप्त गरेको थियो। सोही योजनाअनुसार अब बाँकी शेयर सर्वसाधारणका लागि खुला गर्न लागिएको हो।सार्वजनिक निष्काशनमा न्यूनतम १० कित्तादेखि अधिकतम ९४ हजार कित्तासम्म आवेदन दिन सकिने व्यवस्था गरिएको छ। आवेदन दिने अवधि छिटोमा चैत ३० गतेसम्म रहनेछ भने पूर्ण आवेदन नपरेको अवस्थामा बैशाख १० गतेसम्म निष्काशन अवधि लम्बिन सक्ने कम्पनीले जनाएको छ।आईपीओको जोखिम मूल्याङ्कनका क्रममा केयर रेटिङ्ग नेपाल ले कम्पनीलाई ‘केयरएनपी डबल बी माइनस’ (CARE-NP BB-) इस्यूअर रेटिङ प्रदान गरेको छ, जसले कम्पनीको वित्तीय दायित्व वहन क्षमतामा मध्यम स्तरको जोखिम रहेको संकेत गर्दछ।कम्पनीले सञ्चालनमा ल्याएको ६ मेगावाट क्षमताको बुकु खोला जलविद्युत आयोजना ओखलढुंगा क्षेत्रमा अवस्थित रहेको छ। आयोजनाको कुल अनुमानित लागत १ अर्ब ३७ करोड २० लाख ३९ हजार रुपैयाँ रहेको छ भने प्रतिमेगावाट लागत २२ करोड ८६ लाख ७३ हजार रुपैयाँ निर्धारण गरिएको छ। कम्पनीका अनुसार आयोजनाको साधारण लगानी फिर्ता अवधि ७.७७ वर्ष र छुट दरमा १६.४३ वर्ष रहने अनुमान गरिएको छ।आईपीओ निष्काशन तथा बिक्री प्रबन्धकको रूपमा हिमालयन क्यापिटल लिमिटेड नियुक्त गरिएको छ। लगानीकर्ताले आस्बा सेवामा सहभागी बैंक तथा वित्तीय संस्था मार्फत सि–आस्बा प्रणाली वा मेरो शेयर अनलाइन प्लेटफर्म प्रयोग गरी आवेदन दिन सक्नेछन्।ऊर्जा क्षेत्रप्रति लगानीकर्ताको चासो बढिरहेका बेला यो आईपीओले बजारमा कस्तो प्रतिक्रिया पाउँछ भन्ने विषय चासोको रूपमा हेरिएको छ।