बन्दीपुर केबुलकार एण्ड टुरिजम कम्पनीले आईपीओ निष्कासनका लागि पायो धितोपत्र बोर्डको स्वीकृति

बन्दीपुर केबुलकार एण्ड टुरिजम कम्पनी लिमिटेडले प्राथमिक सेयर (आईपीओ) निष्कासन गर्नका लागि नेपाल धितोपत्र बोर्ड (सेबोन) बाट स्वीकृति प्राप्त गरेको छ। बिहीबार बोर्डले कम्पनीलाई विवरणपत्र प्रकाशनको अनुमति दिएको हो।

कम्पनीले सर्वसाधारणका लागि प्रति कित्ता १ सय रुपैयाँ दरले कुल ५८ लाख ६० हजार कित्ता सेयर निष्कासन गर्न लागेको हो। यस योजनाअन्तर्गत कम्पनीले पहिलो चरणमा आयोजना प्रभावित स्थानीयवासी र वैदेशिक रोजगारीमा रहेका नेपालीलाई प्राथमिकता दिने जनाएको छ।

कम्पनीको क्रेडिट रेटिङ केयर रेटिङ्स नेपाल लिमिटेडले गरेको हो, जसअनुसार कम्पनीले "CARE-NP BB (Is)" रेटिङ प्राप्त गरेको छ। यो रेटिङले मध्यम स्तरको जोखिम रहेको देखाउँछ। निष्कासन तथा बिक्री प्रबन्धकको जिम्मेवारी नेपाल एसबीआई मर्चेन्ट बैंकिङ लिमिटेडले लिएको छ।

धितोपत्र बोर्डबाट अनुमति प्राप्त मिति २०८१ साल असार १९ गते हो। अब चाँडै कम्पनीले आईपीओ निष्कासनको मिति तोकेर आवेदन खुलाउनेछ।