छ महिनामा बैंक निक्षेप ४ खर्ब १७ अर्बले वृद्धि, कर्जा प्रवाहमा सुधार

चालू आर्थिक वर्ष २०८२/८३ को पहिलो छ महिनामा नेपालका बैंक तथा वित्तीय संस्थाहरूमा निक्षेप उल्लेख्य रूपमा बढेको छ। नेपाल राष्ट्र बैंकको तथ्यांकअनुसार यस अवधिमा कुल निक्षेप ४ खर्ब १७ अर्ब ४८ करोड रुपैयाँले बढ्दै ७६ खर्ब ८१ अर्ब ३५ करोड रुपैयाँ पुगेको छ, जुन ५.७ प्रतिशतको वृद्धि हो। वार्षिक आधारमा निक्षेप १४.८ प्रतिशतले बढेको छ, जसमा चल्ती, बचत र मुद्दती निक्षेपको अंश क्रमशः ६.९, ४१.३ र ४२.८ प्रतिशत रहेको छ। संस्थागत निक्षेपको हिस्सा ३५.१ प्रतिशत रहेको छ। निजी क्षेत्रतर्फ प्रवाहित कर्जा १ खर्ब ९७ अर्ब ४७ करोड रुपैयाँले बढेर ५६ खर्ब ९५ अर्ब १७ करोड रुपैयाँ पुगेको छ। कुल कर्जामध्ये गैरवित्तीय संस्थागत क्षेत्रमा ६२.७ प्रतिशत र घरपरिवार क्षेत्रमा ३७.३ प्रतिशत प्रवाह भएको छ। घरजग्गा धितोमा आधारित कर्जाको अंश ६३.९ प्रतिशत रहेको छ भने कृषि तथा वस्तु सुरक्षणमा आधारित कर्जा १५ प्रतिशत रहेको छ। उपभोग, निर्माण, यातायात, उद्योग र सेवा क्षेत्रमा कर्जा बढेको छ भने कृषि क्षेत्रमा कर्जा १.१ प्रतिशतले घटेको छ। मार्जिन, आयात, हायर पर्चेज र अन्य कर्जाहरूमा वृद्धि देखिँदा बैंकिङ प्रणालीमा तरलता र कर्जा प्रवाह क्रमशः सुधार हुँदै गएको संकेत देखिएको छ।