नागढुंगा–सिस्नेखोला सुरुङमार्गको सञ्चालनका लागि ठेकेदार कम्पनी छनोट

काठमाडौं । लामो समयदेखि प्रतीक्षामा रहेको नागढुंगा–सिस्नेखोला सुरुङमार्ग सञ्चालन, व्यवस्थापन र मर्मतसम्भारका लागि ठेकेदार कम्पनी अन्ततः छनोट भएको छ। आयोजनाले चिनियाँ कम्पनी चोङकिङ युसिन रोड एन्ड ब्रिज डेभलपमेन्ट र नेपाली कम्पनी एआरटी कन्स्ट्रक्सन को संयुक्त उपक्रम (जेभी) युसिन–एआरटी लाई जिम्मेवारी दिने निर्णय गरेको छ।सोमबार जारी सार्वजनिक सूचनाअनुसार, जेभी कम्पनीले २.६५ किलोमिटर लामो सुरुङमार्गको आगामी पाँच वर्षसम्म सञ्चालन, मर्मतसम्भार र प्राविधिक व्यवस्थापनको काम गर्नेछ। ठेक्का भ्याट र प्रोभिजलनलसहित कुल १ अर्ब १० करोड ४० लाख ३७ हजार ८ सय रुपैयाँमा पाएको छ, जुन सरकारी लागत अनुमानभन्दा करिब ४० प्रतिशत कम हो। सम्झौताअनुसार कम्पनीले वार्षिक औसत २२ करोड रुपैयाँमा सुरुङमार्गको संचालन तथा मर्मतसम्भार सम्हाल्नेछ।आयोजनाले नोभेम्बर २, २०२५ मा बोलपत्र आह्वान गरेको थियो। प्राप्त प्रस्तावहरूमध्ये सबैभन्दा कम रकम प्रस्ताव गर्ने कम्पनीलाई आशयको सूचना जारी गरिएको थियो। अब छनोट भएको कम्पनीलाई सात दिनभित्र ठेक्का सम्झौताका लागि सम्पर्क गर्न बोलाइएको छ। सम्झौतापछि कम्पनीले सुरुङमार्गभित्रका उपकरण सञ्चालन, सुरक्षा व्यवस्थापन, ट्राफिक नियमन र नियमित मर्मतसम्भारको जिम्मेवारी सम्हाल्नेछ।नागढुंगा–सिस्नेखोला सुरुङमार्ग नेपालको पहिलो यातायात सुरुङमार्ग हो र यसले काठमाडौं प्रवेश गर्ने सवारी साधनहरूको यात्रा समय र इन्धन खपतमा उल्लेख्य बचत हुने अपेक्षा गरिएको छ।