पेट्रोलियम पदार्थको मूल्य वृद्धि, पेट्रोल १७२ र डिजेल १५२ रुपैयाँ कायम

काठमाडौं । नेपाल आयल निगमले पेट्रोलियम पदार्थको मूल्य बढाएको छ। निगमले आइतबार रातिदेखि लागू हुने गरी पेट्रोल प्रतिलिटर १५ रुपैयाँ तथा डिजेल र मट्टितेल प्रतिलिटर १० रुपैयाँले बढाएको हो।नयाँ मूल्यसूचीअनुसार अब पेट्रोल प्रतिलिटर १७२ रुपैयाँ पुगेको छ भने डिजेल तथा मट्टितेलको मूल्य प्रतिलिटर १५२ रुपैयाँ कायम भएको छ। यसअघि पेट्रोलको मूल्य १५७ रुपैयाँ र डिजेलको मूल्य १४२ रुपैयाँ प्रतिलिटर रहेको थियो।निगमका अनुसार अन्तर्राष्ट्रिय बजारमा इन्धनको मूल्य बढेपछि इन्डियन आयल कर्पोरेसन (आईओसी) बाट उच्च दरको नयाँ मूल्यसूची प्राप्त भएको थियो। तर आईओसीले पठाएको दर पूर्ण रूपमा लागू नगरी उपभोक्तामा कम असर पर्ने गरी आंशिक रूपमा मात्र मूल्य वृद्धि गरिएको निगमले जनाएको छ।भारतबाट पेट्रोल प्रतिलिटर ३१ रुपैयाँ, डिजेल तथा मट्टितेल ५४ रुपैयाँ र एलपी ग्यास २१६ रुपैयाँले बढेर आएको भए पनि निगमले मूल्य स्थिरीकरण कोष र अघिल्लो नाफाबाट केही भार व्यहोर्दै सीमित मात्रामा मात्र मूल्य समायोजन गरेको जनाएको छ।पश्चिम एसियामा बढेको भू–राजनीतिक तनावका कारण अन्तर्राष्ट्रिय बजारमा इन्धनको मूल्य बढेको र त्यसको प्रभाव नेपालमा पनि परेको निगमको भनाइ छ।हालको मूल्य समायोजनपछि पनि आगामी १५ दिनमा निगमलाई करिब ३ अर्ब ९३ करोड रुपैयाँ घाटा हुने अनुमान गरिएको छ। अन्तर्राष्ट्रिय बजारमा मूल्य घटेमा भने तत्कालै मूल्य घटाउने रणनीति अपनाइने निगमले जनाएको छ।