बीमित बिरामीलाई सेवा नदिए कारबाही हुने स्वास्थ्य बीमा बोर्डको चेतावनी

काठमाडौं — विभिन्न अस्पताल तथा स्वास्थ्य संस्थाले स्वास्थ्य बीमा अन्तर्गतका सेवामा आनाकानी गरेको तथा बीमित बिरामीलाई आवश्यक सुविधा नदिएको गुनासो बढेपछि स्वास्थ्य बीमा बोर्डले कडा चेतावनी दिएको छ। बोर्डले कानुनविपरीतका गतिविधि देखिएमा कारबाही गर्ने स्पष्ट संकेत गरेको हो।स्वास्थ्य बीमा कार्यक्रम अन्तर्गत सेवा प्रवाहका क्रममा केही सेवा प्रदायक संस्थाहरूले बीमित सेवाग्राहीलाई दुःख दिएको, समयमै उपचार नदिएको तथा आवश्यक सुविधा उपलब्ध नगराएको पाइएपछि बोर्डले यसप्रति गम्भीर ध्यानाकर्षण भएको जनाएको छ। बोर्डका अनुसार यस्ता व्यवहारले स्वास्थ्य बीमा कार्यक्रमको उद्देश्य नै कमजोर बनाउने खतरा रहेको छ।विशेषगरी, अस्पतालहरूले बीमा सेवा लिन अग्रिम समय लिनुपर्ने व्यवस्था लागू गर्दै बिरामीलाई अनावश्यक झन्झटमा पार्ने, बीमित र नगद तिर्ने बिरामीबीच भेदभावपूर्ण व्यवहार गर्ने तथा आवश्यक औषधि र सेवा नदिने जस्ता समस्या देखिएको बोर्डले उल्लेख गरेको छ। यसले सर्वसाधारणमा असन्तुष्टि बढ्दै गएको पनि बताइएको छ।बोर्डले स्वास्थ्य बीमा ऐन, २०७४ र स्वास्थ्य बीमा नियमावली, २०७५ अनुसार सबै सेवा प्रदायक संस्थाले बीमित बिरामीलाई सहज, समान र गुणस्तरीय सेवा उपलब्ध गराउनुपर्ने स्पष्ट पारेको छ। साथै, प्रचलित कानुन विपरीतका कुनै पनि गतिविधि नगर्न र नगराउन कडा निर्देशन दिएको छ।स्वास्थ्य बीमा बोर्डले अबको दिनमा यस्ता गुनासो दोहोरिएमा सम्बन्धित स्वास्थ्य संस्थामाथि कानुनी कारबाही प्रक्रिया अघि बढाइने जनाएको छ। साथै, बीमित सेवाग्राहीलाई बिना झन्झट सेवा उपलब्ध गराउन सबै अस्पताल तथा स्वास्थ्य संस्थालाई आग्रह गरिएको छ।