होटल तथा पर्यटन समूह दबाबमा: ७ मध्ये ५ कम्पनी घाटामा

नेपाल स्टक एक्सचेन्ज (नेप्से) मा सूचीकृत होटल तथा पर्यटन समूहका कम्पनीहरूको चालु आर्थिक वर्ष २०८२/८३ को दोस्रो त्रैमासिक वित्तीय विवरण अनुसार अधिकांश कम्पनीहरू नोक्सानीमा रहेका छन्। हाल यस समूहमा सूचीकृत ७ कम्पनीमध्ये ५ वटा कम्पनी घाटामा रहेका छन् भने केवल २ वटा कम्पनी मात्र नाफामा देखिएका छन्।

पुस मसान्तसम्मको तथ्यांकअनुसार सोल्टी होटल र कालिञ्चोक दर्शनबाहेक अन्य सबै कम्पनीहरूले नोक्सानी व्यहोरेका छन्। बन्दीपुर केबलकार, ओरियन्टल होटल, चन्द्रागिरि हिल्स, सिटी होटल र तारागाउँ रिजेन्सी घाटामा छन्। सोल्टी होटलले सबैभन्दा बढी ३४ करोड ७५ लाख रुपैयाँ खुद मुनाफा कमाएको छ, जुन गत वर्षको तुलनामा १५.१९ प्रतिशतले वृद्धि हो। त्यस्तै, कालिञ्चोक दर्शनले १ करोड १९ लाख रुपैयाँ नाफा कमाउँदै १५२.६८ प्रतिशतको उल्लेखनीय वृद्धि गरेको छ।

हालै आइपीओ निष्काशन गरेको बन्दीपुर केबलकार ७४ लाख ९१ हजार रुपैयाँ घाटामा रहेको छ। सिटी होटल १० करोड ९ लाख रुपैयाँ घाटामा सीमित रहेको छ भने जेनजी आन्दोलनको प्रभावबाट प्रभावित तारागाउँ रिजेन्सी होटल ९ करोड ७ लाख रुपैयाँ घाटामा रहेको छ। चन्द्रागिरि हिल्स ४ करोड ७० लाख र ओरियन्टल होटल्स २ करोड ७४ लाख रुपैयाँ घाटामा रहेका छन्।

आम्दानीको पक्षमा पनि सोल्टी होटल अग्रस्थानमा रहेको छ। कम्पनीले ६ महिनामा १ अर्ब ४५ करोड रुपैयाँ आम्दानी गरेको छ, जुन गत वर्षको तुलनामा १९.६९ प्रतिशतले बढी हो। बन्दीपुर केबलकार र कालिञ्चोक दर्शनले पनि आम्दानी वृद्धि गरेका छन्। तर तारागाउँ रिजेन्सीको आम्दानी ७५.२६ प्रतिशतले घटेर १७ करोड १९ लाख रुपैयाँमा सीमित भएको छ। चन्द्रागिरि, सिटी होटल र ओरियन्टल होटल्सको आम्दानीमा पनि गिरावट देखिएको छ।

समग्रमा होटल तथा पर्यटन क्षेत्रमा चुनौती कायमै रहेको देखिन्छ। पर्यटन पुनरुत्थानमा ढिलाइ, संरचनागत क्षति र बजारको कमजोर अवस्था कारण अधिकांश कम्पनीहरू दबाबमा छन्।