मध्यपूर्वी तनावबीच इरानले स्ट्रेट अफ हर्मुज पूर्ण रूपमा बन्द गर्यो

काठमाडौँ – संयुक्त राज्य अमेरिका र इरानबीच दुई हप्ते युद्धविराम लगत्तै स्थिति पुनः बिग्रँदा इरानले तेल आपूर्तिका लागि महत्त्वपूर्ण स्ट्रेट अफ हर्मुज पूर्ण रूपमा बन्द गरेको छ । लेबनानमा इजरायलले गरेको भीषण आक्रमणको प्रतिक्रिया स्वरूप यो कदम चालिएको हो जसका कारण तेल ट्यांकरहरू बीच बाटोमै फर्किन बाध्य भएका छन्।इरानको सरकारी सञ्चारमाध्यम प्रेस टिभीका अनुसार, खाडी क्षेत्रबाट बाहिर निस्कन लागेका धेरै तेल ट्यांकरहरू पर्सियन खाडीमै रोकिएका छन्। पहिले, मंगलबारको दुई हप्ते युद्धविरामपछि बुधबार बिहान ग्रीसको बल्क क्यारियर एनजे अर्थ र लाइबेरियाको झण्डा बोकेको डेटोना जहाजले यो जलमार्ग पार गरेका थिए।तर, इजरायलले लेबनानमा गरेको ठूलो स्तरको हवाई आक्रमणमा कम्तीमा २५४ जनाको मृत्यु भएपछि स्थिति अचानक तनावपूर्ण बनेको छ। इरानको अर्ध–सरकारी समाचार एजेन्सी फार्सका अनुसार, लेबनानमा भएको आक्रमणको विरोधमा इरानले हर्मुज जलसन्धिबाट हुने सम्पूर्ण तेल ट्यांकरको आवतजावत रोकिदिएको छ।सिपिङ एनालिटिक्स फर्म केप्लरका अनुसार, मंगलबारसम्म यस क्षेत्रमा १८७ वटा तेल ट्यांकरसहित १,००० भन्दा बढी जहाजहरू प्रतिक्षामा थिए। सामान्य अवस्थामा पनि यति धेरै जहाजलाई बाहिर निस्कन दुई हप्ताभन्दा बढी समय लाग्ने बताइएको छ। यसैबीच, इरानको पोर्ट्स एन्ड म्यारिटाइम अर्गनाइजेसनले बुधबार सुरक्षित नेभिगेसन चार्ट जारी गरेको छ र सबै जहाजहरूलाई बारुदी सुरुङको जोखिमबाट बच्न तोकिएको मार्ग कडाइका साथ पालना गर्न सचेत गराएको छ। विश्वको कुल तेल आपूर्तिको ठूलो हिस्सा यही जलसन्धि भएर जाने भएकाले यसको बन्दले विश्वव्यापी तेल बजार र आपूर्ति शृङ्खलामा गम्भीर असर पर्ने अनुमान गरिएको छ।