नेप्से परिसूचक बिहीबार बढ्यो, सबै उपसमूहको वृद्धिसँगै कारोबार रकम पनि बढ्यो

बिहीबार नेप्से परिसूचक बढेर बन्द भएको छ। अघिल्लो कारोबार दिन बुधबारको सकारात्मक प्रवृत्तिलाई निरन्तरता दिँदै नेप्सेले यस दिन ४८.७१ अंकको वृद्धिसँगै २८५१.२४ विन्दुमा बन्द भएको छ। सेन्सेटिभ इण्डेक्स ४.६४ अंक, फ्लोट इण्डेक्स ३.०२ अंक र सेन्सेटिभ फ्लोट इण्डेक्स १.६९ अंकले बढेका छन् ।कारोबार रकम पनि बढेको छ। बुधबार ८ अर्ब ३१ करोड रुपैयाँबराबरको शेयर कारोबार भएको बजारमा बिहीबार ३३८ स्टकको १ लाख ८ हजार ८६९ पटकको कारोबारमा ९ अर्ब ९१ करोड ९२ लाख १० हजार रुपैयाँबराबरको २ करोड ७९ लाख ३१ हजार कित्ता शेयर किनबेच भएको छ। यस दिन आत्मनिर्भर लघुवित्त, रिलायन्स स्पिनिङ्ग मिल्स, भुजुङ्ग हाइड्रोपावर, रिज लाइन इनर्जी, सोलु हाइड्रोपावर, होटल फरेष्ट इन, सुपर खुदी हाइड्रोपावर र सूर्यकुण्ड हाइड्रो इलेक्ट्रिकका शेयरहरू सकारात्मक सर्किट लेभलमा कारोबार भएका छन् ।त्यस्तै, हिम स्टार उर्जा कम्पनीको शेयरमूल्य साढे ९ प्रतिशतभन्दा बढी र हिमालयन रि इन्स्योरेन्सको शेयरमूल्य साढे ७ प्रतिशतले बढेको छ। कारोबारमा आएको एनआईसी एशिया ब्यालेन्स्ड फण्डको इकाईमूल्य यस दिन सर्वाधिक ६.७४ प्रतिशत घटेको छ। कारोबार रकमका आधारमा नेशनल हाइड्रोपावर कम्पनी शीर्ष स्थानमा रहेको छ, जसको ४३ करोड ४७ लाख ६६ हजार रुपैयाँबराबरको शेयर किनबेच भएको छ। रिडी पावर कम्पनी र हिमालयन रि इन्स्योरेन्स क्रमशः ४१ करोड र करिब ४० करोड रुपैयाँबराबरको शेयर कारोबारमा आएका छन् ।यस दिन १३ वटै उपसमूहको परिसूचक बढेको छ। अन्य उपसमूहको परिसूचक सर्वाधिक ३.४३ प्रतिशतले बढेको छ भने होटल तथा पर्यटन, जलविद्युत र उत्पादन तथा प्रशोधन उपसमूह २ प्रतिशतभन्दा बढीले बढेका छन्। बैंकिङ्ग, वित्त, लगानी, लघुवित्त र निर्जीवन बीमा उपसमूहको परिसूचक १ प्रतिशतभन्दा बढीले बढेको छ ।