भ्रमपूर्ण विज्ञापन नगर्न विज्ञापन बोर्डको अपिल

विज्ञापन बोर्डले पछिल्लो समय सामाजिक सञ्जाललगायत विभिन्न माध्यममा भ्रमपूर्ण विज्ञापनहरू प्रकाशन तथा प्रसारण भइरहेको भन्दै यसो नगर्न अपिल गरेको छ। बोर्डले विभिन्न किसिमका चिया, तेल, स्याम्पो, औषधिलगायत वस्तुले विभिन्न रोग निको पार्ने र जुनसुकै स्वास्थ्य समस्या समाधान गर्ने भन्दै चर्को मूल्यमा बिक्री वितरण गरिने भ्रमपूर्ण विज्ञापन गरिएको पाएको छ।

बोर्डका प्रवक्ता निशानराज गौतमले अनुगमनका क्रममा त्यस्ता विज्ञापनहरूमा वस्तु वा सेवा उत्पादन गर्ने व्यक्ति र कम्पनीको नामसमेत उल्लेख नभएको जनाउँदै, यस प्रकारका विज्ञापनका विषयमा बोर्डमा उजुरीसमेत प्राप्त भइरहेको बताए। उनका अनुसार विज्ञापन (नियमन) ऐन, २०७६ को दफा १५ (ख) अनुसार, कुनै पनि श्रव्य, दृश्य तथा श्रव्यदृश्य विज्ञापन सामग्री प्रसारण गर्नुपूर्व परीक्षण गराएर मात्र प्रसारण गर्नुपर्ने व्यवस्था छ।

बोर्डले विज्ञापन नियमन गर्ने नियमावली, २०७७ को दफा (५) मा विज्ञापन गर्दा विज्ञापनकर्ताको नाम र ठेगाना स्पष्टरूपमा उल्लेख गर्नुपर्ने व्यवस्था रहेको र ऐनको दफा ९ अनुसार उक्त कानुनी व्यवस्थाविपरीत प्रसारित भएका कुनै पनि विज्ञापन तत्काल रोक्न र अनुमति लिएर मात्र प्रसारण गर्न अनुरोध गरेको छ।

प्रवक्ता गौतमले, अनुमतिविना विज्ञापन निरन्तर प्रसारण गरेको पाइएमा कानुनबमोजिम कारबाही प्रक्रिया अघि बढाइने जानकारी दिएका छन्। यसरी विज्ञापन बोर्डले भ्रमपूर्ण विज्ञापन नगर्न अपिल गर्दै, कानुनी व्यवस्थाहरूको पालना गर्न आग्रह गरेको छ। यसले गर्दा उपभोक्ताहरूलाई सही सूचना प्रदान गर्न र विज्ञापन क्षेत्रलाई व्यवस्थित बनाउन मद्दत पुग्ने विश्वास लिइएको छ।