सेयर बजारको उतारचढावसँगै पुँजीगत लाभकर संकलन घट्यो

काठमाडौं। चालु आर्थिक वर्षको आठ महिनामा सरकारले सेयर बजारबाट करिब साढे ६ अर्ब रुपैयाँ पुँजीगत लाभकर संकलन गरेको छ। सीडीएससीका अनुसार फागुन मसान्तसम्म कुल ६ अर्ब ४४ करोड १० लाख रुपैयाँभन्दा बढी लाभकर उठेको हो। सर्वाधिक संकलन साउनमा भएको थियो, जुन महिनामा २ अर्ब १५ करोड रुपैयाँभन्दा बढी लाभकर उठेको थियो। त्यसपछि भदौदेखि क्रमशः उतारचढाव देखिए पनि समग्र ट्रेन्ड ओरालो लागेको छ। भदौमा ६० करोड, असोजमा २४ करोड, कात्तिकमा ३८ करोड, मंसिरमा ६३ करोड, पुसमा ५८ करोड र माघमा १ अर्ब २९ करोड रुपैयाँभन्दा बढी लाभकर संकलन भएको थियो।फागुनमा मात्र ५५ करोड १५ लाख रुपैयाँ संकलन भएको छ, जुन माघ महिनाको तुलनामा आधाभन्दा बढी गिरावट हो। संकलित करमध्ये सबैभन्दा ठूलो हिस्सा अल्पकालीन व्यक्तिगत लगानीकर्ताबाट आएको छ। उनीहरूले ३२ करोड ६ लाख रुपैयाँभन्दा बढी लाभकर तिरेका छन्। दीर्घकालीन लगानीकर्ताबाट १७ करोड ७ लाख र संस्थागत लगानीकर्ताबाट करिब ६ करोड २ लाख रुपैयाँ संकलन भएको छ। यसले छोटो अवधिका कारोबार सक्रिय भए पनि दीर्घकालीन लगानी र संस्थागत सहभागिता कमजोर रहेको संकेत गर्छ।हालको व्यवस्थाअनुसार व्यक्तिगत लगानीकर्ताले ५–७.५ प्रतिशत र संस्थागत लगानीकर्ताले १० प्रतिशत पुँजीगत लाभकर तिर्नुपर्ने छ। एक वर्षभन्दा बढी अवधिमा सेयर बिक्री गर्नेले ५ प्रतिशत र एक वर्षभन्दा कम अवधिमा बिक्री गर्नेले ७.५ प्रतिशत कर तिर्नुपर्छ। बजारमा उतारचढावले प्रत्यक्ष असर पारेको कारण कर संकलनमा पनि वृद्धि वा गिरावट देखा परेको छ।