सिटी होटल लिमिटेडको अवितरित हकप्रद शेयर बाँडफाँड सम्पन्न, तीन समूहका लागि अलग–अलग कट–अफ मूल्य निर्धारण

सिटी होटल लिमिटेडले अवितरित हकप्रद शेयरहरूको बाँडफाँड प्रक्रिया औपचारिक रूपमा सम्पन्न भएको घोषणा गरेको छ। कम्पनीले संस्थापक, कर्मचारी तथा सर्वसाधारण समूहमा बाँकी रहेका शेयर शिलबन्दी बोलपत्र प्रणालीमार्फत बिक्री गर्ने निर्णय गरेको थियो। निर्धारित समयावधि भित्र प्राप्त बोलपत्रहरूको मूल्यांकनपछि कम्पनीका सञ्चालक समितिले मंसिर ११ गते (२०८२/०८/११) अन्तिम बाँडफाँड स्वीकृत गरेको हो।

यसअघि कम्पनीले कूल २१ लाख ५० हजार ४१८ कित्ता शेयर बिक्रीका लागि खुला गरेको थियो। जसमध्ये संस्थापक समूहतर्फ १९ लाख ८९ हजार ९९९ कित्ता, कर्मचारी समूहतर्फ लक–इन अवधि कायम ६ हजार कित्ता र सर्वसाधारण समूहतर्फ लक–इनमा नरहेका १ लाख ५४ हजार ४१९ कित्ता शेयर अवितरित रहेकाहरू थिए। यी शेयर कात्तिक २३ देखि कात्तिक ३० सम्म शिलबन्दी बोलपत्रका लागि खुला गरिएको थियो।

बोलपत्र खोल्ने काम मंसिर ५ गते सम्पन्न गरिएको थियो। बोलपत्रको प्रतिस्पर्धा, माग र मूल्य प्रस्तावको तुलनाका आधारमा बाँडफाँड गर्दा तीनै समूहका लागि छुट्टाछुट्टै कट–अफ मूल्य निर्धारण गरिएको कम्पनीले जनाएको छ। संस्थापक समूहका लागि कट–अफ मूल्य रु २५१, कर्मचारी समूहका लक–इन शेयरका लागि रु ३०६.१० र सर्वसाधारण समूहका लक–इनमा नरहेका शेयरका लागि रु ४३६ कायम भएको छ। कम्पनीका अनुसार सोही मूल्य वा बढी प्रस्ताव गर्ने बोलपत्रकर्तालाई सापेक्षिक समानुपातिक विधिबाट शेयर वितरण गरिएको हो।

बाँडफाँडमा नपरेका आवेदकहरूको रकम फिर्ता प्रक्रिया पनि सुरु गरिएको छ। मंसिर १२ गतेदेखि आवेदकले आफूले उल्लेख गरेको बैंक खातामा IPS प्रणालीमार्फत रकम पठाइने कम्पनीले जनाएको छ। रकम समयमै खातामा नपुगेमा प्रभु क्यापिटल लिमिटेड, कमलादीमा सम्पर्क राख्न सकिने सूचना जारी गरिएको छ।

कम्पनीले बाँडफाँडसँग सम्बन्धित विस्तृत विवरण बिक्री प्रबन्धक प्रभु क्यापिटलको वेबसाइटमार्फत हेर्न सकिने जनाएको छ। पारदर्शी विधिबाट अगाडि बढाइएको यस प्रक्रियाले लगानीकर्ताको विश्वास बढाउने अपेक्षा गरिएको छ।