अर्थमन्त्री र वित्तीय नियामकबीच भेट, स्थायित्व र लगानी विस्तारमा जोड

काठमाडौं — अर्थमन्त्री रमेश्वर खनालसँग बैंक तथा वित्तीय संस्थाहरू (बीएफआई) नियमन गर्ने प्रमुख निकायका प्रमुखहरूले मंगलबार भेटवार्ता गरेका छन्। सिंहदरबारस्थित अर्थ मन्त्रालयमा भएको उक्त भेटमा वित्तीय स्थायित्व, लगानी प्रवर्द्धन तथा आर्थिक सुशासनलगायत विषयमा छलफल भएको हो।बैठकमा नेपाल राष्ट्र बैंकका गभर्नर विश्वनाथ पौडेल, नेपाल बीमा प्राधिकरणकी अध्यक्ष चन्द्रकला पौडेल तथा नेपाल धितोपत्र बोर्डका अध्यक्ष सन्तोष नारायण श्रेष्ठ सहभागी थिए। अर्थ मन्त्रालयका प्रवक्ता टंकप्रसाद पाण्डेका अनुसार उक्त भेटमा समग्र वित्तीय प्रणाली सुदृढीकरणका विषयमा विचार आदानप्रदान गरिएको थियो।भेटका क्रममा अर्थमन्त्री खनालले देशको वित्तीय स्थायित्व कायम राख्न र लगानीमैत्री वातावरण निर्माण गर्न नियामक निकायहरूले खेलेको भूमिकाको प्रशंसा गरे। उनले पूँजी बजारमा पारदर्शिता अभिवृद्धि गर्न र वित्तीय प्रणालीलाई व्यवस्थित बनाउन नियामक निकायहरूको योगदान महत्वपूर्ण रहेको बताए।उनले आर्थिक सुशासन सुदृढ गर्न र वित्तीय अनुशासन कायम गर्न समेत सम्बन्धित निकायहरूले पुर्‍याएको सहयोगप्रति धन्यवाद व्यक्त गरेका थिए।जवाफमा नियामक निकायका प्रमुखहरूले अर्थ मन्त्रालयसँगको सहकार्य सकारात्मक र प्रभावकारी रहेको बताएका छन्। उनीहरूले मन्त्रालयले अघि सारेका नीति तथा निर्देशनहरूले बैंकिङ तथा वित्तीय क्षेत्रको स्थायित्व बलियो बनाउन सहयोग पुगेको उल्लेख गरेका थिए।बैठकमा बैंक तथा वित्तीय संस्थाको स्थायित्व कायम राख्ने, लगानी वृद्धि गर्ने, वित्तीय क्षेत्रमा पारदर्शिता अभिवृद्धि गर्ने र पूँजी बजारको विकासलाई थप सुदृढ बनाउने विषयमा केन्द्रित रहेर छलफल भएको बताइएको छ।सरकार र नियामक निकायबीचको यस्तो समन्वयले दीर्घकालीन आर्थिक वृद्धि र वित्तीय क्षेत्रको दिगोपनामा टेवा पुग्ने अपेक्षा गरिएको छ।