नेप्सेको सीईओ छनोटका लागि पाँच उम्मेदवारको संक्षिप्त सूची सार्वजनिक

नेपाल स्टक एक्सचेन्ज लिमिटेड (नेप्से) को प्रमुख कार्यकारी अधिकृत (सीईओ) छनोट तथा सिफारिस समितिले पाँच उम्मेदवारको संक्षिप्त सूची सार्वजनिक गरेको छ। समितिले चुडामणी चापागाईं, नारद कुमार लुईंटेल, पूर्णप्रसाद आचार्य, बद्रीप्रसाद प्याकुरेल र हेमन्त बस्याललाई सर्टलिस्टमा राखेको हो।

गत फागुन १२ र १८ गते सार्वजनिक सूचना जारी गरी दरखास्त आह्वान गरेको समितिले युवराज दाहाल, प्रविण अधिकारी, बिमल कुमार तिवारी, कृष्णबहादुर कार्की र मुकुन्दराज जोशीलाई भने सर्टलिस्टमा समावेश गरेन। सर्टलिस्टमा परेका उम्मेदवारहरूको व्यावसायिक कार्ययोजनाको प्रस्तुतीकरण र अन्तर्वार्ता चैत ६ गते बुधबार बिहान ७ बजे अर्थ मन्त्रालयमा हुने भएको छ।

प्रस्तुतीकरण र अन्तर्वार्तापछि समितिले सीईओ नियुक्तिका लागि सिफारिस गर्नेछ। समितिको सिफारिसका आधारमा मन्त्रिपरिषद् बैठकले एक जनालाई सीईओ नियुक्त गर्ने निर्णय गर्नेछ। नेप्सेको सीईओ छनोटका लागि अर्थ मन्त्रालयले फागुन ११ गते सेवन्तक पोखरेलको संयोजकत्वमा तीन सदस्यीय सिफारिस समिति गठन गरेको थियो। समितिमा सहसचिव अमृत लम्साल र डा. खोमराज खरेल सदस्य छन्।