जेद्दामा युक्रेन र अमेरिकाबीच उच्चस्तरीय वार्ता: ३० दिने युद्धविरामको सहमति

जेद्दा, साउदी अरेबिया - मंगलवार साउदी अरेबियाको जेद्दामा युक्रेन र अमेरिकी प्रतिनिधिमण्डलबीच उच्चस्तरीय वार्ता सम्पन्न भएको छ। वार्तापछि जारी संयुक्त विज्ञप्तिमा अमेरिकाले युक्रेनलाई सुरक्षा सहायता पुनः सुरु गर्ने र खुफिया जानकारी आदानप्रदानमा कुनै अवरोध नराख्ने प्रतिबद्धता व्यक्त गरेको छ। वार्ताको क्रममा युक्रेनले अमेरिकी प्रस्तावलाई स्वीकार गर्दै ३० दिने अस्थायी युद्धविरामका लागि सहमति जनाएको छ।

ह्वाइट हाउसमा आयोजित कार्यक्रममा अमेरिकी राष्ट्रपति डोनाल्ड ट्रम्पले युद्धविराम प्रस्तावबारे बोल्दै युक्रेनको सहमतिलाई स्वागत गरेका छन्। उनले रुसी राष्ट्रपति भ्लादिमिर पुटिनसँग प्रत्यक्ष संवादको सम्भावना रहेको उल्लेख गर्दै रुसले पनि यो प्रस्तावको समर्थन गर्ने अपेक्षा व्यक्त गरे। ट्रम्पले आपसी समझदारीका लागि पहल गर्ने संकेतसमेत दिए।

अमेरिकी विदेश सचिव मार्को रुबियोले वार्तामा साउदी अरेबियाको मध्यस्थताको प्रशंसा गरे। उनले रुसले युद्धविरामका सर्तहरू स्वीकार गरी शान्ति वार्तामा अघि बढ्नुपर्ने बताउँदै राष्ट्रपति ट्रम्पको पहलले नै यो सम्भव भएको दाबी गरे। उनका अनुसार, युद्ध अन्त्य नै यो वार्ताको मुख्य लक्ष्य हो।

वार्तामा अमेरिकाको तर्फबाट विदेश सचिव मार्को रुबियो, राष्ट्रिय सुरक्षा सल्लाहकार माइक वाल्ट्ज र मध्यपूर्व राजदूत स्टीभ विटकफ सहभागी थिए। युक्रेनको प्रतिनिधित्व भने राष्ट्रपति भोलोडिमिर जेलेन्स्कीका प्रमुख कर्मचारी एन्ड्री येर्माक, विदेशमन्त्री एन्ड्रि सिबिहा र रक्षामन्त्री रुस्टेम उमरोभले गरेका थिए।

रुसी विदेश मन्त्रालयकी प्रवक्ता मारिया जाखारोभाले राज्य समाचार संस्था ताससँग कुरा गर्दै आगामी दिनमा अमेरिकी पक्षसँग सम्पर्क हुन सक्ने संकेत गरेकी छन्। गत फेब्रुअरी २८ मा ह्वाइट हाउसमा राष्ट्रपति ट्रम्प र उपराष्ट्रपति जेडी भान्ससँग युक्रेनी राष्ट्रपति जेलेन्स्कीबीच विवाद भएपछि दुई देशबीचको सम्बन्धमा तिक्तता आएको थियो। अमेरिकाले सैन्य सहायता र खुफिया जानकारी रोकेपछि कीभले सम्बन्ध सुधारका लागि निरन्तर प्रयास गर्दै आएको छ।

अब रुसले यो युद्धविराम प्रस्तावमा कस्तो प्रतिक्रिया दिन्छ भन्ने विषयले सबैको ध्यान खिचेको छ। रुसको सहमतिले युद्ध अन्त्यको दिशामा ठूलो कदम चालिने विश्वास गरिएको छ।