धनतेरसका अवसरमा सुनको मूल्यमा ऐतिहासिक बृद्धि, चाँदीको मूल्य पनि बढ्यो

धनतेरसका अवसरमा सुनको मूल्यले नयाँ उचाई कायम गरेको छ । सुनको मूल्य प्रति तोला १ हजार ५०० रुपैयाँले बढेर ऐतिहासिक उच्च बिन्दुमा पुगेको हो। नेपाल सुनचाँदी व्यवसायी महासंघका अनुसार, आज छापावाला सुनको मूल्य प्रति तोला १ लाख ६८ हजार ५०० रुपैयाँ पुगेको छ, जुन हालसम्मकै उच्च हो। सोमबार छापावाला सुन प्रति तोला १ लाख ६७ हजार रुपैयाँमा कारोबार भएको थियो भने आइतबार प्रति तोला १ लाख ६७ हजार ४०० रुपैयाँमा कारोबार भएको थियो।

धनतेरसका दिन सुन र चाँदीको उच्च माग हुने भएकाले यस दिन सुनको मूल्यमा बृद्धि भएको व्यवसायीहरु बताउँछन्।

चाँदीको मूल्य पनि ४० रुपैयाँले बढेर प्रति तोला २ हजार १०५ रुपैयाँमा पुगेको छ। सोमबार चाँदी प्रति तोला २ हजार ६५ रुपैयाँमा कारोबार भएको थियो। धनतेरसको अवसरमा सुन र चाँदी खरिद गर्ने चलन रहेकोले बजारमा खरिदकर्ताहरुको चाप बढेको देखिन्छ।