पुँजीबजारमा संस्थापक र साधारण सेयर छुट्याएर दुईवटा आईजीन नम्बर लागू गर्न लगानीकर्ता संगठनहरूको माग

पाँचवटा सेयर लगानीकर्ता संगठनले संस्थापक सेयर र साधारण सेयरलाई छुट्याएर फरक–फरक अन्तर्राष्ट्रिय धितोपत्र पहिचान नम्बर (आईजीन नम्बर) लागू गर्न माग गरेका छन्। नेपाल शेयर बजार लगानीकर्ता संघका अध्यक्ष डा. केशव प्रसाद श्रेष्ठ, नेपाल धितोपत्र लगानीकर्ता संघका महासचिव प्रकाश रजौरे, साधारण लगानीकर्ता संघ नेपालका अध्यक्ष ऋतुजंग जिसी, नेपाल सेयरधनी संघका अध्यक्ष घनश्याम पाण्डे र जनरल इन्भेष्टर एसोसियसनका अध्यक्ष दीपक कार्कीले संयुक्त प्रेस विज्ञप्ति जारी गर्दै यस्तो माग गरेका हुन्।

विज्ञप्तिमा लगानीकर्ता संगठनहरूले सीडीएस एण्ड क्लियरिङ लिमिटेड (सीडीएससी) ले तयार पारेको आईजीन नम्बर सम्बन्धी निर्देशिकाको मस्यौदालाई तत्काल स्वीकृत गर्न नेपाल धितोपत्र बोर्डलाई आग्रह गरेका छन्। उनीहरूले केही कम्पनीका संस्थापक लगानीकर्ताले कर्मचारीसँग मिलेमतो गरी एउटै आईजीन नम्बरको दुरुपयोग गर्दै संस्थापक सेयरलाई सर्वसाधारण सेयरमा परिणत नगरी दोस्रो बजारमा महँगो मूल्यमा बिक्री गर्ने गरेको आरोप लगाउँदै तत्काल छानबिनको माग समेत गरेका छन्।

लगानीकर्ताहरूका अनुसार दुईवटा आईजीन नम्बर लागू गर्नु पुँजीबजारको पारदर्शिता, स्थायित्व र विश्वसनीयता बढाउने दूरदर्शी कदम हो। उनीहरूले निश्चित अवधिपछि नियमअनुसार ती दुईवटा आईजीन नम्बर समायोजन गर्ने नीतिगत व्यवस्थालाई स्वागत गरेका छन्।

विज्ञप्तिमा संस्थापक लगानीकर्ताहरूले तीन वर्षमै सेयर बिक्री गरेर बाहिरिने प्रवृत्ति अन्त्य गर्न माग गरिएको छ। यस्तो प्रवृत्तिले वित्तीय संस्थामा जोखिम बढाउने र सामान्य लगानीकर्ता गलत कम्पनीमा फस्ने अवस्था आउने भएकाले, कम्पनीको सुशासन, जोखिम बहन क्षमता, पारदर्शिता, व्यवस्थापन र व्यावसायिक योजनाको अध्ययन गरेर मात्र आईपीओ र राइट सेयर स्वीकृत गर्नुपर्ने माग गरिएको छ। साथै, अन्य वित्तीय संस्थामा जस्तै सबै प्रकारका कम्पनीमा निश्चित प्रतिशत संस्थागत लगानीकर्ताको अनिवार्य व्यवस्था गर्नुपर्ने माग पनि गरिएको छ।