श्रीनगर एग्रीटेक इन्डस्ट्रीजको आईपीओ आज बन्द, हालसम्म ५.८८ गुणा बढी आवेदन
Author
NEPSE TRADING
श्रीनगर एग्रीटेक इन्डस्ट्रीज लिमिटेड ले असोज २९ गतेदेखि सर्वसाधारणका लागि खुला गरेको २५ लाख १० हजार ४९३ कित्ता साधारण शेयर (IPO) आज बन्द हुँदैछ। कम्पनीले असोज २६ गतेदेखि सर्वसाधारण लगानीकर्ताका लागि आईपीओ खुला गरेको थियो।
कम्पनीको जारी पूँजी १ अर्ब ६३ करोड १२ लाख ५० हजार रुपैयाँ रहेको छ। उक्त पूँजीको २० प्रतिशत अर्थात् ३२ लाख ६२ हजार ५०० कित्ता शेयर सर्वसाधारणका लागि निष्काशन गरिएको हो। यसमध्ये १ प्रतिशत (१ लाख ६३ हजार १२५ कित्ता) रुपन्देही र पाल्पाका उद्योग प्रभावित स्थानीय बासिन्दाका लागि छुट्याइएको थियो। बाँकी १९ प्रतिशत अर्थात् ३० लाख ९९ हजार ३७५ कित्ता शेयर सर्वसाधारणका लागि छुट्याइएको हो।
यस सर्वसाधारण भागबाट १० प्रतिशत अर्थात् ३ लाख ९ हजार ९३८ कित्ता वैदेशिक रोजगारीमा रहेका नेपालीका लागि, ४ प्रतिशत अर्थात् १ लाख २३ हजार ९७५ कित्ता कम्पनीका कर्मचारीका लागि र ५ प्रतिशत अर्थात् १ लाख ५४ हजार ९६९ कित्ता म्युचुअल फण्डका लागि छुट्याइएको छ। बाँकी २५ लाख १० हजार ४९३ कित्ता शेयर सर्वसाधारणका लागि जारी गरिएको हो, जसको आवेदन आज बन्द हुँदैछ।
यस आईपीओको इश्यू म्यानेजर नबिल इन्भेष्टमेन्ट बैंकिङ लिमिटेड रहेको छ। लगानीकर्ताले न्यूनतम १० कित्ता देखि अधिकतम १०,००० कित्तासम्म आवेदन दिन पाउने व्यवस्था थियो।
सीडीएससीका अनुसार, हालसम्म १३ लाख १४ हजार १५३ जनाले जम्मा १ करोड ४७ लाख ८१ हजार ७०० कित्ता शेयरका लागि आवेदन दिएका छन्। यस आधारमा आईपीओ ५.८८ गुणा बढी आवेदन परेको छ।
यसैबीच, ICRA नेपाल लिमिटेड ले श्रीनगर एग्रीटेक इन्डस्ट्रीजको इश्यूअर रेटिङ [ICRANP-IR] B- बाट [ICRANP-IR] B मा उन्नत गरेको छ। यो रेटिङ वित्तीय दायित्व पूरा गर्न असफल हुने जोखिम उच्च रहेको जनाउँछ।
श्रीनगर एग्रीटेक इन्डस्ट्रीज लिमिटेड (SAI) सन् २००४ मा स्थापना भई २०२३ मा सार्वजनिक कम्पनीमा रूपान्तरण भएको हो। कम्पनीले ‘सुनौलो’ र ‘हिमदाना’ ब्रान्ड अन्तर्गत कुखुरा, गाईभैंसी तथा माछा लागि दाना उत्पादन गर्छ। रुपन्देहीमा रहेको कारखानाको वार्षिक उत्पादन क्षमता १ लाख ३५ हजार ७८० मेट्रिक टन रहेको छ। साथै कम्पनीले पोल्ट्री र मासु प्रशोधनमा पनि विस्तार गरेको छ।
मुख्य प्रोमोटरहरूमा सतीशचन्द्र श्रेष्ठ (३४%), चन्द्र पंकज डेभलपर्स (१२%), शिखर इन्स्योरेन्स (८%), सिटिजेन लाइफ इन्स्योरेन्स (४%) र करिब ८३० जना अन्य लगानीकर्ताहरूले ४२% हिस्सा राखेका छन्।
