झापा इनर्जीको आयोजना प्रभावित आईपीओमा आवेदन दिने आज अन्तिम दिन

आयोजना प्रभावित स्थानीयका लागि झापा इनर्जीको प्रारम्भिक सार्वजनिक निष्कासन (आईपीओ)मा आवेदन दिने आज अन्तिम दिन हो। कम्पनीले साउन १४ गतेदेखि पहिलो चरणमा आयोजना प्रभावित क्षेत्रका स्थानीय तथा वैदेशिक रोजगारीमा रहेका नेपालीका लागि आईपीओ बिक्री खुला गरेको थियो। वैदेशिक रोजगारीमा रहेका नेपालीका लागि बिक्री अवधि साउन १८ गतेमै सकिएको छ भने स्थानीयले भने आज बैंकिङ समयसम्म आवेदन दिन सक्नेछन्।

कम्पनीले जारी पुँजी ३८ करोड १ लाख ९० हजार रुपैयाँको १० प्रतिशत अर्थात ३ करोड ८० लाख १९ हजार रुपैयाँ बराबरको प्रतिशेयर १०० रुपैयाँ दरका ३ लाख ८० हजार १९० कित्ता साधारण शेयर बिक्री खुला गरेको हो। स्थानीयका लागि छुट्याइएको कुल कित्तामध्ये १ लाख ९० हजार ९५ कित्ता सेयर प्रत्यक्ष प्रभावित क्षेत्र — झापा जिल्लाको शिवसताक्षी नगरपालिका–४ मा सौर्य विद्युत आयोजना निर्माण तथा सञ्चालन स्थल र १०० मिटर वरपरको क्षेत्रका बासिन्दामा बाँडफाँट गरिनेछ। बाँकी १ लाख ९० हजार ९५ कित्ता सेयर भने शिवसताक्षी नगरपालिका–४ का अन्य बासिन्दामा बाँडफाँट गरिनेछ।

यस आईपीओमा न्यूनतम १० कित्ता र अधिकतम ५ हजार कित्तासम्म आवेदन दिन सकिने व्यवस्था छ। वैदेशिक रोजगारीमा रहेका नेपालीका लागि छुट्याइएको सर्वसाधारणको १० प्रतिशत बराबरको ५७ हजार २९ कित्ता सेयर गत साउन १८ गतेसम्म बिक्रीमा राखिएको थियो।

झापा इनर्जीको आईपीओ बिक्री प्रबन्धकको जिम्मेवारी हिमालयन क्यापिटलले सम्हालेको छ।