चीनसँग बीआरआई सम्झौता अनुदानमा आधारित भएको नेपाली कांग्रेसको दाबी

काठमाडौं। नेपाली कांग्रेसले चीनसँगको बेल्ट एन्ड रोड इनिसिएटिभ (बीआरआई) अन्तर्गत भएको समझदारी अनुदानमा आधारित रहेको दाबी गरेको छ।

सोमबार बसेको कार्यसम्पादन समितिको बैठकपछि पार्टी प्रवक्ता डा. प्रकाशशरण महतले प्रधानमन्त्रीको हालैको चीन भ्रमणका क्रममा भएका दुई पक्षीय समझदारीहरू कांग्रेसको नीतिअनुसार नै भएको जानकारी दिए।

उनका अनुसार, कांग्रेसले पहिल्यै अनुदान स्वीकार गर्ने तर ऋण अस्वीकार गर्ने निर्णय गरेको थियो। बैठकपछि महतले भने, “प्रधानमन्त्रीले स्पष्ट रूपमा अनुदान मात्र लिने र ऋण नलिने कुरा बताउनु भएको छ।”

महतले स्पष्ट गरे अनुसार फ्रेमवर्क समझदारी राष्ट्रिय हितसँग सम्बद्ध विषयवस्तुमाथि केन्द्रित छ। उनले भने, “सहायतामा अनुदान समावेश हुनु स्वाभाविक हो। शर्तसहितको ऋण लिँदा त्यसले दीर्घकालीन असर पार्ने हाम्रो विगतको अनुभवले देखाएको छ।”

पोखरा अन्तर्राष्ट्रिय विमानस्थल परियोजनाको उदाहरण दिँदै उनले भने, “यो परियोजनाले प्रतिफल दिन नसकेको र खराब ऋणको रूपमा परिणत भएको छ। अहिलेको अवस्थामा हामीले ऋण लिनु उपयुक्त छैन।”

नेपाली कांग्रेसले आगामी दिनमा अनुदानमा आधारित परियोजनाहरू मात्रै अघि बढाउने स्पष्ट नीति अपनाएको बताएको छ।