नेपाली शेयर बजारमा ४० अंकको सुधार, कारोबार रकम ६ अर्ब २८ करोड

आइतबार भएको हप्ताको पहिलो कारोबार दिन नेप्से परिसूचकले बलियो सुधार संकेत दिएको छ। लगातार दुई दिनसम्म गिरावटमा रहेको बजार आज झण्डै ४० अंकले उछल्दै उल्लेखनीय सुधारसहित बन्द भयो। नेप्से ३९.९२ अंकले उक्लँदै २६००.२२ विन्दुमा पुगेको छ, जुन बजारका लागि मनोवैज्ञानिक रूपमा अत्यन्तै महत्त्वपूर्ण स्तर मानिन्छ। पछिल्ला केही सातादेखि दवाबमा रहेको बजारले आजको प्रदर्शनमार्फत पुनः बाउन्स हुने सम्भावनालाई निकै बलियो बनाएको छ।

गत बिहीबार करिब ४ अर्ब ६८ करोड रुपैयाँ बराबरको कारोबार भएको थियो भने आइतबार कारोबार रकम वृद्धि हुँदै ६ अर्ब २८ करोड ६७ लाख रुपैयाँ नाघ्यो। सेयर कारोबार संख्या पनि उल्लेखनीय रूपमा बढ्दै १ करोड ३३ लाख ८१ हजार कित्ता पुगेको छ। कारोबार रकम र भोल्युम दुवै बढ्नु बजारमा किन्नेतर्फको दमान बढेको स्पष्ट संकेत हो। सामान्यतया बजार बढ्दाखेरी कारोबार रकम बढ्नु सकारात्मक संकेत मानिन्छ, र आजको बजारले त्यही मनोविज्ञान पुनः देखाएको छ।

आजको कारोबारमा उपसमूहगत तथ्यांक अत्यन्तै अनुकूल देखियो। कुल १३ उपसमूहमध्ये १२ उपसमूह हरियो रहे भने एकमात्र म्युचुअल फन्ड उपसमूह सामान्य रूपमा घटेर बन्द भयो। सबैभन्दा बढी वृद्धि जीवन बीमा उपसमूहमा देखियो, जसले आज २.५५% को बलियो उछाल लियो। पछिल्ला केही दिनदेखि जीवन बीमा क्षेत्रमा लगानीकर्ताको चासो निरन्तर बढिरहेको छ, र आजको उत्कृष्ट प्रदर्शनले यस प्रवृत्तिलाई थप मजबुत बनाएको छ।
यस्तै, आज २३७ वटा कम्पनीका सेयर मूल्य बढे, १८ कम्पनी घटे र २ कम्पनी उस्तै रहे—यो बजारको उच्च ब्रेड्थ र सकारात्मक प्रवृत्तिको स्पष्ट संकेत हो।

यसैबीच, बजारमा आज तीन कम्पनी सकारात्मक सर्किट लेभलसम्म पुगे। सागर डिस्टिलरी, बन्दीपुर केबलकार एण्ड टुरिजम र झापा इनर्जी—यी तीनै कम्पनी नेप्सेमा भर्खरै लिस्टिङ भएको कारण लगानीकर्ताबाट ठूलो ध्यान प्राप्त गर्दै सकारात्मक सर्किट लागेका हुन्।
यता, पिपुल्स हाइड्रोपावर कम्पनी भने ७.६५% ले घट्दै आजको सबैभन्दा ठूलो लूजर रह्यो। पछिल्लो समय हाइड्रो समूहमा उच्च दबाब देखिँदै आएको छ र आजको कारोबारले यो मनोविज्ञानलाई थप पुष्टि गरेको छ।

कारोबार रकमका आधारमा आजको बजारमा NRN Infrastructure & Development सबैभन्दा अगाडि रह्यो। यसको कारोबार रकम ६५ करोड ६० लाख रुपैयाँ नाघ्यो। दोस्रो स्थानमा Peoples Hydropower रह्यो, जसको कारोबार रकम पनि ३४ करोड रुपैयाँभन्दा बढी पुगेको छ। यी तथ्यांकले बजारमा केही छिट्टै चल्ने र उच्च तरलता भएका स्टकहरूमा लगानीकर्ताको विशेष आकर्षण रहेको देखाउँछ।

आजको बजार उकालो लाग्नुमा प्रमुख कारण नेपाल राष्ट्र बैंक (NRB) ले आगामी मौद्रिक नीति समीक्षा मार्फत सेयर बजारमैत्री व्यवस्था ल्याउन सक्ने चर्चा हो। सामाजिक सञ्जालमा व्यापक रूपमा फैलिएको हल्लाअनुसार—

• बैंक तथा वित्तीय संस्थाले कोर क्यापिटलको ४०% भन्दा बढी सेयर धितो कर्जा दिन पाउने

• सेयरमा ६ महिनाभन्दा बढी अवधिका लागि लगानी गर्न पाउने

• २६ महिनाको सीमा हटाउन सकिने

जस्ता महत्वपूर्ण निर्णयहरू आउने सम्भावना छ।
विश्लेषकहरूका अनुसार यस्ता व्यवस्थाले लगानीकर्ताको खरीद क्षमता बढाउने, बजारमा तरलता सहज हुने र समग्र बजारमा बाउन्स झनै बलियो देखिन सक्छ। बैंक प्रणालीमा पर्याप्त तरलता भए पनि कर्जाको माग कम रहेकाले पूँजी बजारलाई जीवन्त बनाउन राष्ट्र बैंकले यस्ता कदम चाल्ने अपेक्षा पनि गरिएको छ।

प्राविधिक विश्लेषण (Technical Analysis)

नेप्से पछिल्ला केही दिनदेखि प्रतिरोधका रूपमा देखिएको डाउनट्रेन्डलाई अन्ततः ब्रेक गर्दै आज ट्रेन्डलाइन माथि मजबुत बन्द भएको छ। प्राविधिक विश्लेषक अजित खनालका अनुसार बिहीबार बनेको ड्रागनफ्लाई डोजी ले बजारमा सम्भावित रिभर्सलको संकेत दिएको थियो, र आजको क्यान्डलले सो संकेत पूर्ण रूपमा पुष्टि गरेको छ।
आजको क्यान्डलले डोजीको हाई ब्रेक गर्दै नयाँ Higher High (HH) बनाएको छ, जुन बलियो ट्रेन्ड रिभर्सलको संकेत हो। बजार मिडल–ब्यान्ड (२०-डे मुभिङ एभरेज) माथि बन्द हुँदै २३.६% Fibonacci Retracement Zone मा स्थिरिएको छ—जसले बजारमा नयाँ अप-ट्रेन्डको सम्भावना अझ प्रस्ट बनाएको छ।

भोल्युमतर्फ हेर्दा—गत कारोबार दिनको तुलनामा आज कारोबार रकम उच्च थियो, जुन ब्रेकआउट क्यान्डलमा देखिएको बढ्दो भोल्युमले पुष्टि गर्छ। आज बजार Gap-up Open भएको थियो र सुरुदेखि नै सकारात्मक रह्यो, यद्यपि अन्तिम एक घन्टामा केही सप्लाई देखापरेको थियो।

सेक्टर–वाइज हेर्दा—सधैंजस्तै उच्च कारोबार ल्याउने हाइड्रो सेक्टरको कारोबार हिस्सा ५०% भन्दा तल झर्‍यो। यता, लगानी समूहको कारोबार हिस्सा उल्लेखनीय रूपमा बढ्यो। अन्य उपसमूहमामा भने खासै संरचनात्मक परिवर्तन देखिएन।

ब्रोकरगत विस्तृत विश्लेषण

१० ठूला ब्रोकरहरूको विवरणले बजारको मनोविज्ञानलाई अझ स्पष्ट बनाउँछ। आज १० मध्ये ६ ब्रोकरले बेच्नुभन्दा बढी किनेर बजारको उकालोलाई मजबुत समर्थन प्रदान गरेका छन्।

बढी बाई गर्ने प्रमुख ब्रोकरहरू: ४५, ३४, ४२, ४८, ५७ र ६२
बढी सेल गर्ने ब्रोकरहरू: ५८, ४९, २८ र ४४

स्टक अनुसार हेर्दा:

• NRN Infrastructure मा ५८ नं. ब्रोकरबाट लगानीकर्ताले २ लाख ५१ हजार कित्ता (कुल बाईको ८०%) किनेर उच्च माग देखाए; त्यही ब्रोकरबाट २ लाख ७१ हजार कित्ता बेचिएको पनि देखिन्छ।

• UMHL मा ६२ नं. ब्रोकरबाट ६२ हजार (कुल बाईको ५२%) किनिएको छ, र ५९ हजार कित्ता सेल गरिएको छ।

• HURJA मा ८४ नं. ब्रोकरबाट ५६ हजार बाई।

• Prime Commercial Bank मा ८ नं. ब्रोकरबाट ४० हजार बाई भएको छ।

यी डाटा अनुसार आजको बजारमा ब्रोकर गतिविधि निकै सक्रिय देखियो र संस्थागत तथा ठूला खेलाडीहरूको प्रभाव बजारको बाउन्समा स्पष्ट देखिएको छ।