नेपालको सार्वजनिक ऋण आकाशिंदै: आठ महिनामै २ खर्ब ४२ अर्ब थपियो

नेपालको सार्वजनिक ऋणले नयाँ उचाइ चुमेको छ, जुन हाल २६ खर्ब ७६ अर्ब ३ करोड रुपैयाँ पुगेको छ। यो कुल गार्हस्थ्य उत्पादन (जीडीपी) को ४६.९१ प्रतिशत हो। फागुनसम्मको तथ्याङ्कअनुसार हरेक नेपालीको भागमा करिब ९१ हजार रुपैयाँ ऋण पर्छ, जुन गत असारको ८३ हजारभन्दा झण्डै ८ हजारले बढी हो।

राष्ट्रिय जनगणना ०७८ अनुसार २ करोड ९१ लाख ६४ हजार ५७८ जनसङ्ख्यालाई आधार मान्दा यो आँकडा थप चिन्ताजनक देखिन्छ। सार्वजनिक ऋण व्यवस्थापन कार्यालयका अनुसार कुल ऋणमध्ये आन्तरिक १३ खर्ब १५ अर्ब ५७ करोड (जीडीपीको २३.०६%) र बाह्य १३ खर्ब ६० अर्ब ४६ करोड (जीडीपीको २३.८५%) छ।

साउनदेखि फागुनसम्म मात्रै नेपालको सार्वजनिक ऋण २ खर्ब ४२ अर्बले बढेको छ। सरकारले यो वर्ष ५ खर्ब ४७ अर्ब ऋण उठाउने लक्ष्य राखेकोमा फागुनसम्म ३ खर्ब ३४ अर्ब ६२ करोड उठाइसकेको छ। यो अवधिमा १ खर्ब ३४ अर्ब ४७ करोड आन्तरिक र २४ अर्ब ५० करोड बाह्य ऋणको सावाँ तिरिएको छ। तर, विदेशी विनिमयदरको उतारचढावले मात्रै ६६ अर्ब २९ करोड थपिएको कार्यालयले जनाएको छ। गत असारमा २४ खर्ब ३४ अर्ब ९ करोड रहेको ऋण छोटो समयमै यति धेरै बढ्नुले आर्थिक व्यवस्थापनमा चुनौती थपिएको संकेत गर्छ।