सूर्यकुण्ड हाइड्रो इलेक्ट्रिक कम्पनी लिमिटेडको आइपीओ बाँडफाँट सम्पन्न

सूर्यकुण्ड हाइड्रो इलेक्ट्रिक कम्पनी लिमिटेडको प्रारम्भिक सार्वजनिक निष्कासन (आइपीओ) आज बाँडफाँट गरिएको छ। बिक्री प्रबन्धक कुमारी क्यापिटल लिमिटेडको कार्यालयमा बिहान ९ बजे गोलाप्रथा प्रक्रियामार्फत बाँडफाँट सम्पन्न भएको हो।

कम्पनीले माघ १८ देखि २१ गतेसम्म सर्वसाधारणका लागि प्रतिकित्ता १०० रुपैयाँ अंकित मूल्यका ५ लाख ७२ हजार ४३१ कित्ता शेयर निष्कासन गरेको थियो। कुल ५ करोड ७२ लाख ४३ हजार १०० रुपैयाँ बराबरको उक्त आइपीओमा २४ लाख ५२ हजार ६०२ जनाले २ करोड ६१ लाख ३२ हजार ८०० कित्ताका लागि आवेदन दिएका थिए। तीमध्ये २४ लाख ११ हजार ९९२ आवेदन स्वीकृत भएका छन् भने बाँकी आवेदन रद्द भएका छन्।

मागभन्दा अत्यधिक आवेदन परेकाले गोलाप्रथा मार्फत ५७ हजार २४३ जनालाई १० कित्ताका दरले शेयर बाँडफाँट गरिएको छ। बाँडफाँटपछि शेष रहेको १ कित्ता शेयर एक जना आवेदकलाई थप गरी कुल ११ कित्ता प्रदान गरिएको बिक्री प्रबन्धकले जनाएको छ।

आवेदकहरूले आइपीओको नतिजा कुमारी क्यापिटलको वेबसाइट, सीडीएससीको आइपीओ रिजल्ट पोर्टल तथा आफ्नो ‘मेरो सेयर’ खातामार्फत हेर्न सक्नेछन्। आवेदन गर्दा प्रयोग गरिएको डीपी आइडी र अन्य विवरण राखेर नतिजा जाँच गर्न सकिनेछ।